Polshanıń Varshava qalasında Evropada qáwipsizlik hám birge islesiw shólkemi (EQBSh) tárepinen insanıylıq normalarına baǵıshlanǵan dástúriy “Warsaw Human Dimension Conference -2025” xalıqaralıq konferenciyası bolıp ótti.

EQBSh sheńberindegi eń iri insan huqıqları forumı esaplanǵan bul ilajda 57 mámleket, sonıń ishinde, Ózbekstan Respublikası, sonday-aq, insan huqıqları shólkemleri, puqaralıq jámiyeti wákilleri hám xalıqaralıq ekspertler qatnastı.
Xalıqaralıq ánjuman sheńberinde Ózbekstan Respublikası Oliy Majlisiniń Insan huqıqları boyınsha wákili (Ombudsman) Feruza Eshmatova Human Rights Watch shólkeminiń Oraylıq Aziya boyınsha úlken izertlewshisi Mira Ritman menen ushırastı.
Sóylesiw waqtında Ózbekstannıń insan huqıqları tarawındaǵı xalıqaralıq minnetlemeleri, sonıń ishinde, Birlesken Milletler Shólkeminiń tiyisli komitetleri tárepinen berilgen usınıslardı ámelge asırıw boyınsha kórilip atırǵan ilajlar dodalandı.
Tárepler, sonday-aq, insan huqıqların qorǵaw tarawındaǵı jumısta óz-ara málimleme almasıw hám birge islesiwdi bunnan bılay da rawajlandırıw máselelerin dodaladı.

N.Abduraimova, ÓzA