Oliy Majlis Nızamshılıq palatasınıń gezektegi májilisi bolıp ótpekte. Onda bir qatar nızam joybarların dodalaw názerde tutılǵan.

Májiliste bir topar deputatlar tárepinen nızamshılıq baslaması huqıqı tiykarında islep shıǵılǵan jeke menshik múlk huqıqınıń kepilliklerin jáne de kúsheytiw, awıl xojalıǵına mólsherlengen jer uchastkalarınan nátiyjeli paydalanıwǵa qaratılǵan nızam joybarı ekinshi oqıwda kórip shıǵıldı.
Mámleketimizde múlk iyeleri huqıqlarınıń kepilliklerin kúsheytiwge, awıl xojalıǵı ónimlerin jetistiriwshilerdiń jumısın qollap-quwatlawǵa qaratılǵan izbe-iz reformalar ámelge asırılmaqta, – dedi deputat M.Ahmedova. – Sonıń menen birge, jeke menshik múlk huqıqınıń hár qanday buzılıwı ushın juwapkershilikti támiyinlew, ijaraǵa alınǵan awıl xojalıǵına mólsherlengen jer uchastkalarınıń bir bólegine bolǵan huqıq hám minnetlemelerdi basqa shaxsqa ótkeriw – qayta ijaraǵa beriwdiń huqıqıy tiykarların belgilew zárúrligi júzege kelmekte. Sonnan kelip shıǵıp, deputatlardıń saylawshılar menen ushırasıwlarında kóterilgen usınıslar tiykarında awıl xojalıǵına mólsherlengen jer uchastkasınıń ijarashısı ózine ijaraǵa berilgen jer uchastkalarınan biri yamasa bir neshewi boyınsha óz huqıqları menen minnetlemelerin basqa shaxsqa ótkeriw (qayta ijaraǵa beriw) múmkin ekenligi norması sáwlelendirilmekte. Sonday-aq, joybarda ayırım nızam hújjetlerine tovarlardıń, xızmetlerdiń hám qarjılardıń erkin háreketleniwine yamasa tovarlardıń realizaciyalanıwına nızamǵa qayshı túrde aralasqanlıq yamasa tosqınlıq etkenlik ushın juwapkershilik belgilenbekte.
Atap ótilgenindey, nızam joybarınıń qabıl etiliwi mámleketimizde jeke menshik múlk huqıqınıń kepilliklerin bunnan bılay da kúsheytiwge, jerden paydalanıwshılardıń kepillik berilgen huqıqlarınıń támiyinleniwine jáne awıl xojalıǵına mólsherlengen jer uchastkalarınan nátiyjeli paydalanıw imkaniyatın arttırıwǵa xızmet etedi.
Statyama-statya dodalawlardan soń nızam joybarı ekinshi oqıwda qabıl etildi.

ÓzA