2024-jıl 17-dekabr. Nókis qalasındaǵı tınısh bir aqsham. Biraq, áyne usı kúni eki jastıń arasındaǵı azǵana sóz alısıw, keń jámiyetti shorshındırǵan tragediyaǵa aylandı.

Más halında kóshede júrgen Jiyenbay (atları ózgertilgen) sigareta shegip atırǵan Murattan temeki soraydı. Biraq, Murat onıń ótinishin orınlamaydı. Usı ápiwayı sebep penen baslanǵan tartıs ashıwǵa aylanadı. Jiyenbay ashıwın basa almay, jerde jatırǵan gerbishti alıp, Murattıń basına uradı.
Jas jigit awır jaraqat aladı. Aqıbetinde es-huwshınan ayrıladı. Bunnan paydalanǵan Jiyenbay Murattıń kiyimlerin hám telefonın alıp, waqıya ornınan qashıp ketedi. Murat alǵan dene jaraqatları aqıbetinde waqıya ornında es-tússiz qalıp, 18-dekabr kúni ózine kelmesten qaytıs boladı.
Bul is jınayat isleri boyınsha Taxtakópir rayonı sudı tárepinen ashıq sud májilisinde kórip shıǵıldı. Sud procesinde Jiyenbay qılmısın moyınladı, pushaymanlıǵın bildirdi. Biraq, jınayat ushın jaza tayın, insan ómirin qayta tiklewge bolmaydı.
Sud húkimine bola, Jiyenbay Ózbekstan Respublikası Jınayat kodeksiniń 104-statyası 3-bólimi “d” bánti (awır dene jaraqatın jetkeriw arqalı ólimge sebep bolıw) hám 164-statyası 3-bólimi “g” bánti (basqınshılıq) menen ayıplı dep tabılıp, úzil-kesil 11 jıl azatlıqtan ayırıldı.
Tilekke qarsı, bul eki jas ta ómirde óz ornın tabıwdı qálegen, ekewi de óz shańaraǵınıń jalǵız perzenti edi. Jiyenbay – burın sport penen shuǵıllanǵan, kúshli jigit bolǵan. Biraq, bir zamatlıq ashıw, máslik hám aqılsız háreket onı da, basqalardı da apatqa jetkerdi.

Murat bolsa ápiwayı, miynetkesh shańaraqtıń jalǵız ulı edi. Endi onıń ata-anası ushın dúnya jım-jırt boldı.
Bul waqıya tek ǵana jınayat emes, al ashıwdıń insan táǵdirindegi ornı haqqındaǵı ashshı sabaq bolıp tabıladı. Bir zamat ashıw, bir sekundlıq aqılsız qarar – eki shańaraqtıń da baxtın oyran etti.
Sonlıqtan zamanlaslarımız ózleriniń ashıwına erk bermesten, bul qayǵılı waqıyadan sabaq shıǵarsa deymiz. Sebebi, insan ómiri biybaha, al, hár bir jınayat ushın jaza sózsiz.

Orazbay Maulenov,
Jınayat isleri boyınsha Taxtakópir rayonı sudı baslıǵı.
Qaraqalpaqstan xabar agentligi