Ózbekstannıń Pakistandaǵı Ayrıqsha hám tolıq huqıqlı elshisi Alisher Twxtaev eki mámleket arasında qospa kárxanalar shólkemlestiriw arqalı óz-ara sawda hám investiciya kólemin arttırıw, atap aytqanda, toqımashılıq tarawın birgelikte rawajlandırıw ushın úlken potencial bar ekenligin atap ótti. Bul haqqında Pakistan málimleme agentligi xabar bergen.

Pakistan toqımashılıq fabrikaları associaciyasına (APTMA) saparı waqtında diplomatımız bul mámlekettegi toqımashılıq kompaniyalarınıń wákillerin elimizde talap joqarı bolǵan sapalı ónimlerge talabın úyreniwge shaqırdı. Ásirese, elimizdiń arzan energiya hám mol paxta rezervi pakistanlı investorlar Ózbekstan bazarında sawda hám investiciyanı rawajlandırıwı ushın tartımlı imkaniyat jaratatuǵının atap ótti.
Elshi eki mámleket arasında bazarǵa kiriwdi ańsatlastırıw boyınsha bir neshe túsinisiw memorandumı hám kelisimge qol qoyılǵanın esletti. Óz-ara tikkeley aviaqatnawlar házirshe sayaxat waqtın 90 minutqa qısqartqan. Pakistan, Awǵanstan hám Ózbekstannıń qatnasıwındaǵı úsh tárepleme tranzit sawda boyınsha sóylesiw sheshiwshi basqıshqa kirgen. Kelisimge erisilgennen soń, sawda aǵımı jáne de tezlesedi. Karachi hám Laxorda ózbek sawda orayları ashılǵan. Gezektegi usınday oray Islamabadta iske qosıladı.
A.Twxtaevtıń atap ótkenindey, Pakistan hám Ózbekstan “básekiles emes, dos mámleketler” hám sonlıqtan eki tárepleme máp jolında resurs, bilim hám tájiriybe almasıw zárúr. Ol APTMA delegaciyasın Ózbekstanǵa keliw, kórgizbeler hám konferenciyalarǵa qatnasıwǵa mirát etti. Jaqın aylarda respublikamızdıń basqa sawda delegaciyaları da bul tuwısqan úlkege keletuǵının qosımsha etti.
APTMA baslıǵı Komron Arshod óz-ara sawdadaǵı mashqalalar, sonıń ishinde, rásmiy bank kanallarınıń joq ekeni, erkin sawda kelisimine qol qoyıw keshigip atırǵanı, etiketlewdegi til tosqınlıǵı, Awǵanstan tranzit jónelisindegi mashqala, Transawǵan temir jolı qurılısınıń tómen pátin atap ótti. Imkaniyatlardı tolıq júzege shıǵarıw ushın bank baylanısların bekkemlew, erkin sawda shártnamasın tezirek dúziw, sawda delegaciyalarınıń turaqlı almasıwın jolǵa qoyıw zárúr ekenligin atap ótti.
Aymaq baslıǵı Asad Shafiy delegaciyaǵa Pakistan toqımashılıq sanaatı haqqında maǵlıwmat berip, kóp ásirlik baylanıslarǵa qaramastan, házirgi óz-ara tovar almasıw kólemi tek ǵana 125 million dollardı quraytuǵının atap ótti. Mámleketi “tigiw revolyuciyası” joybarı sheńberinde toqımashılıq eksportın 50 milliard dollarǵa jetkeriwdi gózlep atırǵanın aytıp, Ózbekstandı usı processte belsene birge islesiwge shaqırdı.

Muharrama Pirmatova, ÓzA