Húrmetli kásiplesler!
Dástúriy tárizde jıllı júzlilik penen qabıllaǵanı hám búgingi sammitimizdi ájayıp tárizde shólkemlestirgeni ushın Tájikstan Respublikası Prezidenti, húrmetli Emomali Sharipovich Rahmon húrmetine bildirilgen shın júrekten minnetdarshılıq sózlerine qosılaman.
Tájikstannıń ǴMDAǵa nátiyjeli basshılıǵın, bul dáwirde mámleketlerimiz arasındaǵı kóp tárepleme sheriklik jańa pát penen rawajlana baslaǵanın ayrıqsha atap ótiwdi qáler edim.
Global siyasat hám ekonomikada qıyın, aldınnan boljap bolmaytuǵın processler júz berip atırǵan sharayatta, xalıqaralıq institutlardıń roli tómenlep baratırǵan bir jaǵdayda ǴMDA óziniń turaqlılıǵı, nátiyjeliligi hám zárúr struktura ekenin kórsetiwdi dawam ettirip atırǵanın atap ótpekshimen.
On jıllar dawamında jaratılǵan mexanizmler hám jolǵa qoyılǵan sóylesiwler sebepli ekonomikalıq, sociallıq hám gumanitarlıq máselelerge baylanıslı barlıq tarawlar boyınsha tıǵız birge islesiw alıp barılmaqta.
Biz ǴMDA sheńberinde birge islesiwdi bunnan bılay da bekkemlew, sonday-aq, tábiyiy sheriklerimiz bolǵan mámleketler menen ámeliy birge islesiwdiń nátiyjeliligin arttırıwdan mápdarmız. Usı múnásibet penen Ózbekstan kóp tárepleme qatnasıqlardı tereńlestiriw boyınsha bildirilgen baha hám usınıslardı qollap-quwatlaydı.
Mámleketlerimiz arasında ekonomikalıq sheriklikti keńeytiw biz ushın, álbette, tiykarǵı baǵdar bolıp esaplanadı. Jáhán ekonomikasında jaǵday tómenlep, protekcionizm kúsheyip atırǵanı, turaqlı rawajlanıwǵa jańa qáwipler payda bolıp atırǵanın esapqa alsaq, bul ayrıqsha áhmiyetke iye.
Ótken jılı Ózbekstannıń ǴMDAdaǵı sherikleri menen sawda aylanısınıń kólemi 11 procentke óskenin atap ótiw zárúr. Óz-ara sawdada ósim kólemi usı jılı da támiyinlenbekte.
Bunday kórsetkishler tarmaqlararalıq kooperaciyanı tereńlestiriw hám mámleketlerimiz arasındaǵı investiciya aǵımlarınıń kóbeyiwi menen tikkeley baylanıslı. Jedel birge islesiwimizdiń pátlerin saqlap qalıw maqsetinde ámeldegi resurslardı jáne de tolıq iske qosıw sheshiwshi másele, dep esaplaymız.
Birgeliktegi háreketlerimizdi tómendegi tiykarǵı máselelerge qaratıwdı usınıs etemiz.
Birinshiden, sawda aylanısın kúsheytiw ushın jáne de qolaylı sharayatlardı qáliplestiriw.
Bul jerde sóz ayırım tovarlardı, birinshi gezekte, awıl xojalıǵı ónimlerin jetkerip beriw procesinde tártip-qaǵıyda hám talaplardı ápiwayılastırıw hám milliy bazarlarǵa kiriw, sonıń ishinde, mámleketlik satıp alıwlarda qatnasıw haqqında barmaqta.
Mámleketlerimiz bazarların óz-ara muwapıq halda keńeytiw áhmiyetli. Usı múnásibet penen ǴMDA Ekonomikalıq keńesi sheńberinde sırtqı konyunktura ózgerislerine jedel juwap beriw hám sawda aǵımlarınıń baǵdarın ózgertiw boyınsha mexanizmlerdi iske qosıw maqsetke muwapıq.
Sonday-aq, texnikalıq tosqınlıqlar hám muwapıqlıqtı bahalawǵa baylanıslı hújjetlerdi tán alıw haqqındaǵı kelisimler joybarların kelisiw baǵdarındaǵı jumıslardı jedellestiriw zárúr, dep esaplaymız.
Ekinshiden, transport tarawında óz-ara birge islesiwdi tereńlestiriw máselelerine ayrıqsha itibar qaratıwdı qáler edim.
Tilekke qarsı, ǴMDA mákanında transport tarmaǵında ámeldegi koridorlardı ótkeriw nátiyjeliligin tómenletetuǵın mashqalalı jaǵdaylar elege shekem saqlanıp qalmaqta.
Barlıq transport túrleri menen integraciyalasqan informaciya-logistika orayların jaratıwdı zamannıń ózi talap etpekte, dep esaplaymız.
Bunnan tısqarı, júk tasıw infrastrukturasın modernizaciyalaw ushın jeke menshik investiciyalardı tartıwdı xoshametlew áhmietli. Usı múnásibet penen transport tarawında mámleketlik-jeke menshik sheriklik máseleleri boyınsha ǴMDA mámleketleri konferenciyasın Ózbekstanda ótkeriwdi rejelestirmektemiz.
Úshinshiden, óz-ara investiciyalardıń ósiwin xoshametlew hám kooperaciya joybarların qollap-quwatlaw.
Birge islesiw boyınsha toplanǵan unamlı tájiriybeni esapqa alıp, mámleketlerimizde arnawlı ekonomikalıq hám sanaat zonalarınıń jumısın rawajlandırıw hám qollap-quwatlawǵa baylanıslı “jol kartası”n tayarlawdı usınıs etemen.
Biznesti tartqan halda kooperaciyanı tereńlestiriw hám innovaciyalıq startaplardı alǵa qoyıw ǴMDAnıń Venchur platformasın jaratıwǵa xızmet etedi.
Kelesi jılı Tashkent “INNOPROM” kórgizbesi sheńberinde mámleketlerimiz aymaqları hám jetekshi kompaniyalarınıń keń qatnasıwında ǴMDA innovaciyalıq sanaat forumın ótkeriwge tayarmız.
Eger kásipleslerimiz maqullasa, ǴMDA Ekonomikalıq keńesine birgeliktegi joybarlardı qollap-quwatlawǵa qaratılǵan baslamalardı ámelge asırıw boyınsha ilajlardı islep shıǵıwǵa kórsetpe beriwdi usınıs etemen.
Tórtinshiden, energetika tarawındaǵı birge islesiw áhmiyetli baǵdarlardan biri bolıp esaplanadı.
Búgingi kúnde ǴMDAdaǵı sheriklerimiz benen dástúriy hám qolaylı energiya dereklerinen paydalanıw, sonıń ishinde, atom elektr stanciyalarınıń qurılısı tarawında bir qatar iri strategiyalıq joybarlardı ámelge asırmaqtamız.
Biz, ǴMDA mámleketlerinde energetika sektorın innovaciyalıq rawajlandırıw boyınsha uzaq múddetli baǵdarlamanı islep shıǵıw hám ámelge asırıw tárepdarımız.
Besinshiden, sanlastırıw tarawındaǵı birge islesiw ayrıqsha itibarǵa ie.
Usı jıldıń avgust ayında Samarqandta shólkemlestirilgen “ǴMDAda jasalma intellekt texnologiyaların rawajlandırıw” temasındaǵı xalıqaralıq forum kooperaciya baǵdarında óz-ara qızıǵıwshılıq hám imkaniyatlardıń ósip baratırǵanın kórsetti.
ǴMDA boyınsha sheriklerimizdiń bul tarawdaǵı jedel háreketlerin qollap-quwatlaymız hám Ámeliy birge islesiwdi keńeytiw boyınsha kóp tárepleme reje islep shıǵıwdı usınıs etemiz.
Húrmetli kásiplesler!
Biz ilim, bilimlendiriw, mádeniyat hám kórkem óner tarawında qospa baǵdarlamalardı keńeytiwden mápdarmız.
Mámleketlerimizde bilimlendiriw sektorı hám miynet bazarı jedel rawajlanıp atırǵanın esapqa alıp, Diplomlar, qánigelik hám akademiyalıq baǵdarlamalardı óz-ara tán alıw haqqında jańa mámleketleraralıq kelisimdi tayarlaw, Professional standartlar hám qánigelik talapların úylestiriw mexanizmin engiziw zárúr, dep esaplaymız.
Kún tártibine innovaciyalıq ekosistemalardı qáliplestiriw, jas áwladtıń dóretiwshilik hám intellektuallıq potencialın qollap-quwatlaw ushın Jaslar laboratoriyasın jaratıw máselesin kirgizgen halda, ǴMDA Jaslar forumın Xiywada qabıllawǵa tayarmız.
Húrmetli sammit qatnasıwshıları!
Búgin mámleketlerimizdiń qáwipsizligi hám turaqlılıǵına ulıwma qáwip-qáterler haqqında kóp aytıldı.
Sırtqı siyasat uyımları hám arnawlı xızmetler baǵdarları boyınsha sistemalı hám tıǵız baylanıslardı dawam ettiriw áhmiyetli. Bul jerde sóz birge islesiwdi muwapıqlastırıw, málimleme almasıw hám qospa ilajlardı ótkeriw haqqında barmaqta.
Doslıq awqamınıń qubla shegaraları haqqında sóz eter ekenbiz, Awǵanstanda saqlanıp qalıp atırǵan qıyın jaǵdaydı umıtpawımız kerek. Bul mámlekette ekonomikalıq hám sociallıq krizis tereńlesip atırǵanın esapqa alsaq, onıń aymaǵınan bolatuǵın qáwip-qáterler saqlanıp qalmaqta.
Ózbekstan Awǵanstanda uzaq múddetli tınıshlıq, tatıwlıq hám turaqlı rawajlanıwdı támiyinlewdiń isenimli tárepdarı ekenin atap ótemen.
Usı múnásibet penen bul mámlekette iri investiciyalıq hám infrastrukturalıq joybarlardı ámelge asırıwda birgelikte qatnasıw imkaniyatların kórip shıǵıwdı usınıs etemiz.
Húrmetli kásiplesler!
Biz húrmetli Sergey Nikolaevich Lebedevtiń Doslıq Awqamı Bas xatkeri lawazımına qayta tayınlanıwın tolıq qollap-quwatlaymız.
Sózimniń juwmaǵında Túrkmenstan Prezidenti, húrmetli Serdar Gurbangulievich Berdimuhamedovqa ǴMDAda basshılıqtı qabıl etip alıwı múnásibeti menen tabıslar tileymen.
Bul ushırasıw hám qabıl etilip atırǵan qararlar óz-ara paydalı kóp tárepleme birge islesiwdi bunnan bılay da keńeytiwge imkaniyat jaratatuǵınına, xalıqlarımız hám mámleketlerimizdiń rawajlanıwı hám abadanlıǵı jolındaǵı ulıwma maqset hám wazıypalarımızǵa erisiwge xızmet etetuǵınına isenemen.