Berdaq atındaǵı Qaraqalpaq mámleketlik universitetinde «Biz bir shańaraq perzentlerimiz» atamasında milletler aralıq tatıwlıq hám doslıq festivalı bolıp ótti.

Ótkerilgen bul ilaj Shet tilleri fakultetiniń baslaması menen shólkemlestirilip, onda Respublika ruwxıylıq hám aǵartıwshılıq orayı Qaraqalpaqstan Respublikalıq bólimi baslıǵı T.Atamuratov, “Nuranıy” qorı Qaraqalpaqstan Respublikası bóliminiń baslıǵı T.Abdidjabbarov, fakultet professor-oqıtıwshıları, kórkem óner tarawınıń wákilleri hám student-jaslar qatnastı.
Ilajdı universitet rektorı wazıypasın waqıtsha atqarıwshısı O.Duysenbaev mámleketimizdegi kóp milletli xalıqlardıń óz-ara awızbirishilik hám doslıqta jasap atırǵanı, olardıń abadan turmıs keshiriwi ushın jaratılǵan sharayatlar haqqında keń túrde aytıp, bul húrmetli Prezidentimiz tárepinen elimizde júrgizilip atırǵan ádil siyasattıń nátiyjesi ekenligin ayrıqsha atap ótti.
Bunnan soń, sózge shıqqanlar, Ózbekstan óziniń kóp ásirlik bay tariyxıy miyrası hám mádeniyatı menen tek ǵana Oraylıq Aziyada emes, al pútkil dúnyada belgili ekenligin hám bul rawajlanıw búgingi kúnde de dawam etip atırǵanına toqtaldı. Sonıń ishinde «Jańa Ózbekstan» degen túsinik tek ǵana mámleketimizdiń jańa siyasiy sistemasın emes, al xalqımızdıń jańa doslıq hám mádeniyatqa bolǵan kózqarasın da bildiretuǵınlıǵın aytıp ótti.
Festival sheńberinde milletler aralıq doslıq hám tatıwlıqtı sáwlelendiriwshi milliy lipaslar kórgizbesi, saxnalıq shıǵıwlar hám koncert baǵdarlamaları jıynalǵanlar názerine usınılıp, hár bir shıǵıw, qosıq hám xalıq ayaq oyınları bárshege ózgeshe zawıq baǵıshladı.
Qullası aytqanda, bul festival elimizde jasap atırǵan hár bir millet wákiliniń ana Watanı – Ózbekstan qushaǵında qanshelli erkin, teń hám tınısh ómir súrip atırǵanın jáne bir márte kórsetti.

Qaraqalpaqstan xabar agentligi