Ekonomika hám qarjı ministrliginde Kuveyttiń “Combined Group Contracting Company” (CGC) kompaniyasınıń wákilleri menen ushırasıw ótkerildi.

Onda tárepler birge islesiw imkaniyatları hám mámleketlik-jeke menshik sheriklik joybarların dodaladı.
Atap ótilgenindey, CGC 1965-jılı shólkemlestirilgen. Ol Kuveyt fond birjasında dizimge alınǵan hám iri infrastruktura jáne sanaat qurılıs kompaniyası sıpatında tanılǵan. Kompaniya qurılıs, jol hám transport infrastrukturası, neft-gaz qubırları hám energetika obektlerin qurıwda úlken tájiriybege iye. Sonday-aq, Kuveyt, Saudiya Arabstanı hám GCC mámleketlerinde bir qatar iri joybarlardı ámelge asırǵan.
Sóylesiw dawamında tárepler mámlekette MJSh tiykarındaǵı joybarlar ushın bar imkaniyatlar, energetika hám jol infrastrukturasın rawajlandırıwǵa qaratılǵan jańa baslamalar, sonday-aq, xalıqaralıq birge islesiw máseleleri boyınsha pikir alıstı.
Bunnan soń CGC wákilleri óz tájiriybesi hám iri infrastrukturalıq joybarlardaǵı imkaniyatların usındı.
Ministrlik málimleme xızmetiniń xabarına bola, sóylesiwlerdiń juwmaǵında tárepler birge islesiw baylanısların bekkemlew, perspektivalı mámleketlik-jeke menshik sheriklik joybarların birgelikte ámelge asırıw hám ámeliy birge islesiwdi dawam ettiriwge kelisip aldı.

N.Ziyodullaeva, ÓzA