2025-jıl 5-8-oktyabr kúnleri Ándijan wálayatınıń Bulaqbashi rayonında 15 jasqa shekemgi jas óspirimler arasında Regbi-7 boyınsha Ózbekstan kubogi bolıp ótti.

Jarısqa mámleketimizdiń barlıq aymaqlarınan kúshli komandalar qatnasıp, kubok jeńimpazlıǵı ushın óz-ara keskin gúres alıp bardı.
Atap aytqanda, qızıqlı ótken oyınlar juwmaǵında, qızlar arasında qaraqalpaqstanlı regbishiler ózleriniń sheberliklerin kórsetip, kuboktiń qola medalın jeńip alıwǵa miyasar boldı.
Respublikamızdıń saylandı komandasın tájiriybeli trenerlerden Jetkerbay Bazarov, Qutlımurat Primatov hám Túgelbay Sadwaqasovlar tayarladı.
– Turnir eki basqıshta ótkerildi, – deydi komandanıń bas treneri Jetkerbay Bazarov. – Dáslepki topar basqıshında, onnan keyingi basqıshta da qızlarımız jaqsı oyın kórsetip, yarım finalǵa shıqtıq. Biraq, yarım finalda bizlerge biraz áwmet hám tájiriybe jetispedi. Aldaǵı waqıtları bul kemshiliklerdi dúzetip, chempionlıq ushın gúres alıp baramız dep xalqımızdı isendirip qalaman.
Maǵlıwmat ushın aytatuǵın bolsaq, bul jarısta Xorezm wálayatı qızları birinshi, namanganlılar ekinshi orındı iyelewge miyasar boldı.
Jarıs sońında jeńimpaz komanda hám sıylı orın iyeleri shólkemlestiriwshiler tárepinen tayarlanǵan medallar, diplomlar hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı