Prezident Shavkat Mirziyoev ayrıqsha jaǵdaylardıń aldın alıw hám olardı saplastırıw sistemasın jetilistiriwge baylanıslı prezentaciya menen tanıstı.

Mámleketimizde xalıqtıń qáwipsizligin támiyinlew húkimettiń tiykarǵı wazıypalarınan biri. Hár qıylı qáwip-qáterler payda bolıp atırǵan házirgi zamanda ayrıqsha jaǵdaylar uyımları sistemasın da jetilistiriw zárúrligi payda bolmaqta.
Tarawda 30 dan aslam nızam hújjetleri qabıl etilgen bolsa da, elege shekem ayrıqsha jaǵdaylardan qorǵaw boyınsha kompleksli baǵdarlama joq. Bunnan 16 jıl aldın qabıl etilgen “Órt qáwipsizligi haqqında”ǵı nızam házirgi kúnniń talaplarına juwap bermeydi.
Sonlıqtan, ayrıqsha jaǵdaylardı aldınnan bahalap, jedel hám proaktiv isleytuǵın sistema jaratıw wazıypası qoyıldı.
Prezentaciyada juwapkerler bul baǵdardaǵı tallaw nátiyjeleri, bar mashqalalar hám usınısların bildirdi.
Házir ayrıqsha jaǵdaylardıń aldın alıw boyınsha profilaktikalıq jumıslar tiykarınan mámleketlik uyımlarda ámelge asırılmaqta. Biraq bunday jaǵdaylardıń 70 procentten aslamı xalıqtıń úylerinde nasaz, múddeti ótken gaz hám elektr úskenelerinen paydalanıw, qáwipsizlik mádeniyatına ámel etpew aqıbetinde júzege kelmekte.
Sonıń ushın sistema jumısın máhállelerde shólkemlestirip, ayrıqsha jaǵdaylardıń aldın alıw, qáwipsizlik mádeniyatın arttırıw boyınsha ilajlar menen hár bir máhálle, hár bir kóshe hám shańaraqtı qamtıp alıw zárúr ekenligi atap ótildi.
Tarawda sanlı texnologiyalar hám zamanagóy texnikalıq qurallardan paydalanıw dárejesi biraz tómen, bul baǵdardaǵı jumıslar elege shekem zaman talaplarına beyimlestirilmegen.
Sonlıqtan, tarawda sanlı infrastruktura jaratıw, ayrıqsha jaǵday haqqında xabar beriwden baslap, onı tolıq saplastırıwǵa shekemgi barlıq processlerdi sanlastırıw, sonday-aq, jańa jumıs islew mexanizmlerin engiziw boyınsha tapsırma berildi.
Ayrıqsha jaǵdaylardı jedel saplastırıw ushın zamanagóy texnika hám úskenelerdi kóbeytiw, olardı ózimizde islep shıǵarıwdı jolǵa qoyıw zárúr ekenligi kórsetip ótildi.
Keyingi jıllarda mámleketimizde barlıq tarmaqlar transformaciyalanbaqta, qurılıs industriyası ózgermekte. Barlıq tarawlarda “jasıl” texnologiyalar keńnen engizilmekte. Olar arqalı júzege keliwi múmkin bolǵan jańa túrdegi texnogen qáwiplerdi bahalap, aldın alıw ushın zamanagóy kadrlardı tayarlaw, qayta tayarlaw hám mamanlıǵın arttırıwdıń úzliksiz sistemasın jaratıw áhmiyetli ekenligi atap ótildi.
Usı múnásibet penen Ayrıqsha jaǵdaylar ministrligi akademiyasında dual bilimlendiriwdi jolǵa qoyıw hám mamanlıq arttırıw orayın shólkemlestiriw, professional qutqarıwshılardı tayarlaw, oqıtıw hám ilimiy izertlewler kólemin keńeytiw tapsırıldı.

ÓzA