Ózbekstan Respublikası Oliy Majlisi Senatında Hayal-qızlardıń jámiyettegi rolin arttırıw, gender teńlik hám shańaraq máseleleri boyınsha respublikalıq komissiyanıń májilisi bolıp ótti.

Komissiya baslıǵı Tanzila Norboeva alıp barǵan májiliste 2030-jılǵa shekem Ózbekstan Respublikasında gender teńlikke erisiw strategiyasınıń orınlanıwı tereń sın kózqarastan dodalandı.
T.Norboeva mámleketimiz basshısınıń basshılıǵında hayal-qızlardı hár tárepleme qollap-quwatlaw, belsendiligin arttırıw, olardıń potencialın júzege shıǵarıw ushın zárúr sharayatlar jaratıw boyınsha keń kólemli jumıslar ámelge asırılıp atırǵanın atap ótti. Ásirese, hayal-qızlardıń mápin qorǵawdıń nızamshılıq hám institucionallıq tiykarın bekkemlew jolında áhmiyetli ilajlar kórilmekte.
Bul baǵdarda 200 den aslam kompleksli ilajlar izbe-iz ámelge asırılıp, nátiyjede hayal-qızlardıń jámiyettegi ornı hám abırayı sezilerli dárejede bekkemlendi.
Sonıń ishinde, joqarı bilimlendiriwdiń bakalavriat basqıshında hayal-qızlardıń úlesi 38 procentten 53 procentke ósti. Magistratura basqıshında bul kórsetkish 34 procentten 66 procentke kóterildi. Doktoranturada bilim alıp atırǵan hayal-qızlardıń sanı bolsa 584 ten 4 mıń 129 ǵa jetti.
Ásirese, ekonomika tarmaqlarında hayal-qızlardıń belsendiligi artıp, isbilermenlik penen shuǵıllanıp atırǵan hayal-qızlardıń sanı 69 mıńnan 262 mıńǵa shekem kóbeydi.
Siyasiy tarawda hayal-qızlardıń úlesi sezilerli dárejede arttı. Atap aytqanda, siyasiy partiyalardaǵı hayal-qızlardıń úlesi 30 procentten 41 procentke jetti, parlamenttegi úlesi bolsa 16,4 procentten 34 procentke ósti.
Parlamentleraralıq Awqam tárepinen júrgiziletuǵın “Parlamenttegi hayal-qızlar” reytinginde Ózbekstan 193 mámleket arasında 130-orınnan 38-orınǵa (92 tekshe) kóterildi. Jáhán bankiniń gender teńlik tarawındaǵı sońǵı esabatında Ózbekstan dúnyadaǵı eń tez rawajlanıp atırǵan 5 mámleket qatarına kirgizildi.
Májiliste Ózbekstan Respublikasınıń milliy máplerine sáykes keletuǵın hayal-qızlar hám er adamlar ushın teńdey huqıq jáne imkaniyatlardı jaratıwǵa qaratılǵan xalıqaralıq shártnamalardı ratifikaciyalaw, hayal-qızlardıń isbilermenligin bunnan bılay da rawajlandırıw arqalı olardıń bántligin támiyinlew, zorlıq hám kúsh kórsetiw jaǵdaylarınıń aldın alıw hám basqa da áhmiyetli máseleler dodalandı.
Májiliste juwapkerlerge Gender teńlikke erisiw strategiyasın 2026-jılı ámelge asırıw boyınsha kompleksli ilajlar baǵdarlamasın islep shıǵıw boyınsha tapsırma berildi.
Baǵdarlamada mámleketlik puqaralıq xızmette hám milliy kadrlar rezervinde hayal-qızlardıń úlesin arttırıw, bilimlendiriw hám málimleme texnologiyaları tarawlarında hayal-qızlardıń qatnasın arttırıw, olardıń sanlı kónlikpelerin rawajlandırıw, ekonomikalıq imkaniyatlardı keńeytiw hám isbilermenlikti rawajlandırıw, basım ótkeriw hám zorlıqtıń aldın alıw mexanizmlerin kúsheytiwge baylanıslı máselelerge ayrıqsha itibar qaratıw wazıypası belgilendi.
Májiliste usı jıldıń 25-noyabrinen 10-dekabrine shekem ótkeriliwi rejelestirilgen “Zorlıqqa qarsı 16 kún” xalıqaralıq akciyasın nátiyjeli shólkemlestiriw máseleleri de dodalandı. Akciya sheńberinde xalıq arasında zorlıqqa qarsı gúresiw, gender teńlikti úgit-násiyatlaw hám hayal-qızlardıń huqıqların qorǵawǵa qaratılǵan keń kólemli ilajlar ótkeriw rejelestirilgeni atap ótildi.
Májiliste respublikalıq hám jergilikli atqarıw uyımları juwapkerleriniń málimlemesi tıńlanıp, aldaǵı wazıypalar belgilep alındı.

Norgul ABDURAIMOVA,
ÓzAnıń xabarshısı