Nókiste ótkerilgen miynet yarmarkasında Germaniya, Slovakiya, Bolgariya, Latviya, Litva, Polsha, Xorvatiya, CHernogoriya, Serbiya, Turkiya, Yaponiya, Qubla Koreya hám Rossiya sıyaqlı mámleketlerdegi 12,5 mıńǵa shamalas jumıs ornı usınıldı.

Qaraqalpaqstan Respublikası Ministrler Keńesi, Ózbekstan Respublikası Ministrler Kabineti janındaǵı Migraciya agentligi, Qaraqalpaqstan Respublikası Kámbaǵallıqtı qısqartıw hám bántlik ministrligi hám Jeke menshik bántlik agentlikleri associaciyası tárepinen birgelikte shólkemlestirilgen miynet yarmarkasında “Job Bridge”, “Workmall”, “Common Sense”, “NPS Personal”, “Getwork”, “The kasb”, “GlobalHR”, “Interwork” jeke menshik bántlik agentlikleri tárepinen jumıs ornı usınıs etildi. Bul jumıs orınlarına 1 mıń 300 puqara qızıǵıwshılıq bildirip, sonnan 980 i dizimnen ótkerildi.
Yarmarkada jámi 1 mıń 800 den aslam jaslar, hayal-qızlar, miynet migraciyasında bolıp qaytqan shaxslar hám jumıs izlep atırǵan puqaralar qatnastı.

Ilajda, sonday-aq, 549 jergilikli kárxana hám shólkemniń 2 mıńnan aslam bos jumıs ornı usınıs etilip, 158 jumıssız puqaraǵa jumısqa ornalasıw ushın jollama berildi. Sonnan 147 puqara respublikamızdaǵı túrli kárxana hám shólkemlerdegi bos jumıs orınlarına turaqlı jumısqa jaylastırıldı. Bunnan tısqarı, 9 puqaraǵa kásip-óner úyreniw hám qánigeligin arttırıw kurslarına jollama, keleshekte turaqlı jumıs orınlarına jumısqa jaylasıwı hám tártipli migraciyaǵa ketiwi boyınsha 310 jumıssız puqaraǵa kerekli másláhát berildi.
Sonday-aq, Kásiplik kónlikpeler orayı (monoray) tárepinen sırt elde talap joqarı bolǵan kásipler (elektrik, qurılıs qánigeleri, shashtárezlik, xızmet kórsetiw tarawları hám basqalar) boyınsha qısqa múddetli oqıw baǵdarlamaları, shet tili kursları haqqında úgit-násiyat jumısları alıp barıldı. Nátiyjede 30 dan aslam puqara dizimge alınıp, til hám kásip-óner úyreniw ushın jiberildi.
Ilajda kommerciyalıq bankler – puqaralarǵa sırt elde jumıs islew ushın zárúr qarjını jıynaw, jumısqa kiriw procesinde finanslıq qollap-quwatlaw, jeńilletilgen kreditler hám xalıqaralıq pul ótkermeleri boyınsha xızmet túrlerin usındı. Nátiyjede 55 puqaraǵa fizikalıq shaxslar ushın jaratılǵan kredit boyınsha túsinik jumısları alıp barıldı.
Búgingi kúnde áhmiyetli másele, jeke menshik bántlik agentlikleriniń nızamlı jumısı, puqaralardı aldawshılıq yamasa nızamsız jumısqa tartıw jaǵdaylarınıń aldın alıw, adam sawdasına qarsı gúresiw boyınsha, migraciya agentligi Qaraqalpaqstan Respublikası filialı, Qaraqalpaqstan Respublikası Migraciya hám puqaralıqtı rásmiylestiriw bóliminiń xızmetkerleri tárepinen qatnasıwshılarǵa málimleme hám másláhát xızmetleri kórsetildi.
70 ten aslam jasqa Jaslar isleri agentligi Qaraqalpaqstan Respublikası basqarması tárepinen shet tillerin úyreniw ushın oqıw orayları usınıs etildi. “WORK AND TRAVEL” xalıqaralıq baǵdarlamalarında qatnasıp atırǵan student jaslar ushın ssuda ajıratılıwı máseleleri boyınsha usınıslar berildi.
Juwapkerlerdiń atap ótiwinshe, sırt elli kompaniyalar hám jeke menshik bántlik agentlikleri tárepinen dizimge alınǵan qatnasıwshılardıń hújjetleri úyrenip shıǵıladı hám maqul bolǵanları jumısqa mirát etiledi.

Qaraqalpaqstan xabar agentligi