Usı jıldıń 30-oktyabr kúni Samarqandta óz jumısın baslaytuǵın hám 13-noyabrge shekem dawam etetuǵın YuNESKO Bas konferenciyasınıń 43-sessiyasında shólkemge jańa bas direktor saylanadı.

Keshe Parijde óz jumısın juwmaqlaǵan YuNESKO Atqarıw komitetiniń 222-sessiyası shólkemniń jańa bas direktorı lawazımına mısırlı 54 jastaǵı Xolid Ahmad al-Ananidiń kandidaturasın usınıs etti. Dawıs beriw procesinde Xolid al-Anani kandidaturası ulıwma kópshilik dawıs (55 tárepdar hám 2 qarsı dawıs) alıwǵa eristi.
Xolid al-Anani mısırtanıwshı alım, Xeluan universiteti professori. Otız jıldan aslam waqıttan berli usı jerde sabaq beredi. Ol Franciyanıń Monpele qalasında jaylasqan Pol Valeri universitetinde egiptologiya boyınsha filosofiya doktorı dárejesin alǵan hám usı universitette de sabaq bergen.
2014-2016-jıllarda Egipet civilizaciyası milliy muzeyin basqarǵan, 2016-jıldan 2022-jılǵa shekem Egipet Arab Respublikası áyyemgi esteliklerdi qorǵaw ministri, keyin turizm hám áyyemgi esteliklerdi qorǵaw ministri sıpatında jumıs alıp barǵan. 2024-jıl noyabr ayında Dúnya júzilik turizm shólkemi tárepinen mádeniy turizm boyınsha arnawlı elshi etip tayınlanǵan hám keyin ala Afrika pútkil jer júzilik miyrası qorınıń qáwenderi bolǵan.
Xolid al-Anani óziniń saylaw aldı úgit-násiyatlawın “UNESCO for the People” (“YuNESKO xalıq ushın”) súreni astında alıp bardı. Shólkemdi xalıqlarǵa jáne de jaqınlastırıw, bilimlendiriw, mádeniyat hám ilim tarawlarına birinshi dárejeli áhmiyet qaratıwǵa shaqırdı. Bas direktor lawazımına rásmiy tastıyıqlanǵannan soń “Keleshek bilimlendiriwi”, “Intellektuallıq miyras”, “Biohártúrlilik”, “Etika hám jasalma intellekt” sıyaqlı baǵdarlarǵa ayrıqsha itibar qaratatuǵının málim etti.
Xolid al-Anani kandidaturası 6-noyabr kúni Samarqandta shólkemge aǵza mámleketler wákilleriniń qatnasıwındaǵı Bas konferenciya sessiyasında dawısqa qoyılıwı kútilmekte. Bas konferenciya tárepinen saylanǵannan soń, ol noyabr ortasında lawazımına kirisedi hám ámeldegi basshı Odre Azule xanımnıń ornın iyeleydi.

Ǵ.HASANOV, ÓzAnıń xabarshısı