Bunnan bir neshe jıl aldın Ózbekstan Respublikası Prezidentiniń baslaması menen Xojeli rayonın sociallıq-ekonomikalıq jaqtan rawajlandırıwǵa járdem beriwi ushın Buxara wálayatı qáwender sıpatında biriktirlgen edi. Usı ótken jıllar ishinde buxaralılardıń járdemi menen Xojeli rayonı xalqına múnásip sharayat jaratıw hám sociallıq qorǵawǵa mútáj xalıqtı hár tárepleme qollap-quwatlaw, jumıssızlardıń bántligin támiyinlew maqsetinde kóplegen iygilikli jumıslar ámelge asırıldı.
Mine usınday ózgerisler hám jańalanıwlardan jámiyetshilikti keńnen xabardar etiw maqsetinde, Ózbekstan jurnalistler awqamı Qaraqalpaqstan bólimi hám Buxara wálayatı hákimligi baspasóz xızmetiniń shólkemlestiriwi menen Xojeli rayonında press-tur ótkerildi.
Ilajǵa respublikamızdaǵı ǵalaba xabar quralları wákilleri, oraylıq telekanallar hám internet basılımlarınıń aymaqlıq xabarshıları qatnastı.
Press-tur qatnasıwshıları dáslep rayonlıq medicina birlespesinde boldı.
Ótken dáwir dawamında Buxara wálayatı hákimligi tárepinen rayonlıq medicina birlespesiniń materiallıq-texnikalıq bazasın bekkemlew boyınsha da bir qatar jumıslar ámelge asırılǵanın atap ótiw kerek.
Bunnan tısqarı, buxaralı shıpakerlerdiń járdeminde bir qatar quramalı joqarı texnologiyalıq xirurgiyalıq operaciyalar ótkerildi.
– 2022-2023-jılları Buxara wálayatı hákimligi tárepinen medicina birlespesine UZI, IVL, Kyuvez hám basqa da zamanagóy úskeneler alıp berildi, – deydi Xojeli rayonlıq medicina birlespesi baslıǵınıń emlew isleri boyınsha orınbasarı Faxriddin Rozımov. – Sonday-aq, bıyılǵı jıldıń ózinde buxaralı shıpakerler tárepinen kem támiyinlengen hám awır jaǵdaydaǵı 35 nawqasqa biypul quramalı operaciyalar islendi.
– Bólimimiz Kyuvez apparatına oǵada mútáj edi, – deydi tuwıw bóliminiń meńgeriwshisi Aygúl Xodjaniyazova. – Buxara wálayatı hákimligi tárepinen 2023-jılı biyǵárez túrde zamanagóy medicinalıq apparatlar alıp berildi. Bunıń nátiyjesinde nárestelerge xızmet kórsetiw sapası artıp, ornı tolmas awır jaǵdaylardıń aldı alınbaqta.
Ilaj dawamında Birlespe juwapkerleri jurnalistlerge áne usılar haqqında aytıp berdi.
Xojeli rayonındaǵı oraylıq stadion 2005-jılı qurılǵan. Biraq, ótken jıllar dawamında stadionǵa ońlaw jumısları júrgizilmegenlikten, ol kapital ońlawǵa mútáj halǵa kelip qalǵan edi. Bunı itibarǵa alǵan Buxara wálayatı hákimligi bul jerde qurılıs hám abadanlastırıw jumısların baslap jiberdi.
– Xojeli rayonınıń oraylıq stadionında kapital rekonstrukciya jumısların júrgiziw ushın tender tańlawı ótkerilip, onda «Modern Mega stroy» juwapkershiligi sheklengen jámiyeti jeńimpaz boldı, – deydi Buxara wálayatı hákimligi janındaǵı “Birden-bir buyırtpashı injiniring xızmeti” mámleketlik unitar kárxanasınıń bas qánigesi Shaxrux Palvonov. – Atap aytqanda, qolı gúl qurılısshılar tárepinen 1000 tamashagóyge mólsherlengen stadion, 2500 tamashagóyge mólsherlenip islenbekte. Sonday-aq, futbol maydanı jasalma jasıl qaplamaǵa ózgertilip, juwırıw jolları qurıldı. Házirgi waqıtta bul jerde sońǵı basqıshtaǵı qurılıs-ońlaw jumısları ámelge asırılmaqta. Bul maqsetlerge 4 mlrd 706 mln sum qarjı ajıratıldı.
Jurnalistlerge sport kompleksinde ámelge asırılıp atırǵan qurılıs-dóretiwshilik jumısları haqqında maǵlıwmat berildi.
Ózbekstan Respublikası Ministrler Kabinetiniń 2023-jıl 2-fevraldaǵı “Qaraqalpaqstan Respublikasında xalıq ushın múnásip turmıs sharayatın jaratıw hám máhállelerdiń infrastrukturasın bunnan bılay da jaqsılaw ilajları haqqında”ǵı qararı tiykarında, Xojeli rayonında 899 turaq jaydı ońlaw, jańadan qurıw rejelestirilgen. Házirgi waqıtqa kelip Buxara wálayatı hákimligi járdeminde, rayonda 27 turaq jay jańadan qurılıp, 620 turaq jaydıń tóbesi shiferlanǵan.
Press-tur qatnasıwshıları Sarıshúńgil awıl puqaralar jıyını aymaǵında jaylasqan «Qırıq úyli» awılında jasawshı Ǵafur Esjanovtıń shańaraǵı mısalında bul baǵdarda ámelge asırılǵan jumıslardıń gúwası boldı.
– Aymaǵımızda jeti mıńǵa shamalas xalıq tınısh-tatıw turmıs keshirmekte, – deydi Sarıshúńgil awıl puqaralar jıyını baslıǵı Zafar Qudaybergenov. – Húrmetli Prezidentimizdiń baslaması menen Buxara wálayatı hákimligi aymaǵımızǵa qáwender etip bekitilgen edi. Ótken jıllar ishinde buxaralılardıń járdeminde 3 kem támiyinlengen shańaraqqa tazadan úy qurılıp, 92 úydiń tóbesi shiferlanıp berildi. Bunıń ushın Buxara wálayatı hákimligine úlken raxmet aytamız.
– Eki qız, bir ulım bar, – deydi Ǵafur Esjanov. – Ómirlik joldasım awır kesellikke shalınǵan. Ózim qol ushı talap isleymen. Sonsha waqıt dawamında turaq jay qurıwǵa imkaniyatım bolmadı. Ótken jılı meniń usınday qıyın jaǵdayda jasap atırǵanımdı inabatqa alıp, maǵan Buxara wálayatı hákimligi tárepinen barlıq qolaylılıqlarǵa iye jańa úy salıp berildi. Bunıń ushın húrmetli Prezidentimiz hám Buxara wálayatı hákimliginen oǵada minnetdarman.
Ilaj dawamında jurnalistler aymaqta ámelge asırılıp atırǵan basqa da kóplegen jumıslardı kózden keshirip, olar boyınsha tiyisli qánigeler hám puqaralardan kerekli maǵlıwmatlardı aldı.

Adilbay Orazov,
Qaraqalpaqstan xabar agentligi sholıwshısı.