Parlamenttiń tómengi palatasınıń májilisinde “Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam joybarı birinshi oqıwda kórip shıǵıldı.

Atap ótilgenindey, bul nızam joybarı menen “Jergilikli mámleketlik hákimiyat haqqında”ǵı nızamǵa hákim lawazımına talaban tiyisli xalıq deputatları Keńesinde onıń kandidaturası kórip shıǵılıp atırǵanda, aymaqtı sociallıq-ekonomikalıq rawajlandırıwdıń keleshekke mólsherlengen baǵdarlaması menen bir qatarda korrupciyaǵa qarsı gúresiw rejesin de usınıwın názerde tutatuǵın ózgerisler kirgizilmekte.
Sonday-aq, “Ózbekstan Respublikası Oliy Majlisi Nızamshılıq palatasınıń Reglamenti haqqında”ǵı hám “Ózbekstan Respublikası Ministrler Kabineti haqqında”ǵı nızamlarǵa Ministrler Kabineti aǵzasınıń lawazımına talaban onıń kandidaturası Nızamshılıq palatasında kórip shıǵılıp hám maqullanıp atırǵanda, Ministrler Kabinetiniń háreketler baǵdarlaması menen óz-ara baylanıslı bolǵan, keleshekke mólsherlengen maqsetli kórsetkishler hám wazıypalarǵa erisiw baǵdarındaǵı huqıqıy, ekonomikalıq, sociallıq, shólkemlestiriwshilik-texnikalıq ilajlardı názerde tutatuǵın háreketler rejesinen tısqarı korrupciyaǵa qarsı gúresiw rejesin de usınıwı názerde tutılmaqta.
Nızam joybarındaǵı normalar hákimler hám Ministrler Kabineti aǵzalıǵına talabanlardıń korrupciyaǵa qarsı gúresiw boyınsha juwapkershiligin hám esap beriwin arttırıwǵa, olardıń korrupciyanıń aldın alıw boyınsha wazıypalarınıń orınlanıw nátiyjeliligin támiyinlewge xızmet etedi.
Hújjet joybarınıń áhmiyetli ekenligi atap ótilip, ekinshi oqıwda da qabıl etildi.

Muhtarama Komilova, ÓzA.