Oliy Majlis Nızamshılıq palatasınıń gezektegi májilisi óz jumısın basladı. Onda bir qatar nızam joybarları hám parlamentlik qadaǵalaw jumısına baylanıslı máseleler dodalanıwı rejelestirilgen.

Májiliste dáslep “Xalıqtı shawqımnıń zıyanlı tásirinen qorǵaw haqqında”ǵı nızam joybarı ekinshi oqıwda statyama-statya kórip shıǵıldı.
Deputat B.Eshmirzaevtıń atap ótkenindey, xalıqtı shawqımnıń zıyanlı tásirinen qorǵaw tarawındaǵı qatnasıqlardı tártipke salıw maqsetinde islep shıǵılǵan bul nızam joybarı deputatlar hám taraw qánigeleriniń usınısları tiykarında ekinshi oqıwǵa tayarlanǵan hám jetilistirilgen. Atap aytqanda, joybar menen puqaralardıń tınıshlıǵı hám normalda dem alıwın buzıwǵa jol qoyılmaytuǵın waqıtlar aralıǵın ámeldegi jeti saattan (saat 23:00 den 06:00 ge shekem) segiz saatqa (saat 23:00 den 07:00 ge shekem), dem alıs kúnleri hám nızamshılıq penen belgilengen jumıs islenbeytuǵın bayram kúnleri bolsa saat 22:00 den 09:00 ge shekemgi waqıt aralıǵına ózgertiw usınıs etilmekte. Usı waqıt aralıǵında puqaralardıń tınıshlıǵın hám normalda dem alıwın buzǵanı ushın hákimshilik juwapkershilik ilajları kúsheytilmekte.
Sonday-aq, xalıq jasaytuǵın kóp kvartiralı turaq jaylarda shawqımnıń jol qoyılatuǵın dárejesinen asatuǵın qurılıs hám ońlaw jumısların jumıs kúnleri saat 09:00 den 18:00 ge shekem ámelge asırıw múmkin ekenligi belgilep qoyılmaqta.
Shawqımnıń zıyanlı tásiri nátiyjesinde jetkerilgen zıyan ushın kompensaciya sud tártibinde óndiriliwi, kompensaciya tólew shawqımnıń zıyanlı tásiriniń aldın alıwǵa qaratılǵan ilajlardı orınlawdan azat etpewi, shawqımnıń jol qoyılatuǵın dárejesinen joqarı bolǵan miynet sharayatlarındaǵı jumıslarda bánt bolǵan xızmetkerlerdiń miyneti ushın miynet haqqındaǵı nızamshılıqqa tiykarlanıp arttırılǵan muǵdarda haqı tóleniwi belgilenbekte.
Puqaralardıń tınıshlıǵın hám normal dem alıwın buzıwǵa jol qoyılmaytuǵın waqıt aralıǵında belgilengen normadan artıq shawqımǵa turaqlı túrde jol qoyıp atırǵan obektlerdiń jumısın toqtatıp turıw mexanizmi anıqlastırılmaqta.
Dodalawlarda deputatlar ayırım normalar boyınsha sorawlardı ortaǵa tasladı. Qánigeler sorawlarǵa tiyisli juwaplar berip, hár bir tarawda belgilengen shawqım norması bar ekenligin, mine, usı normadan asıp ketse, juwapkershilik belgilenetuǵının atap ótti. Sonday-aq, fizikalıq hám yuridikalıq tárepler xalıqtı shawqımnıń zıyanlı tásirinen qorǵaw ushın qanday ilajlardı kóriwi kerek ekenligi, bul baǵdardaǵı talaplar nızamnan kelip shıǵatuǵın hújjetlerde de belgilep qoyılıwı múmkin ekenligi aytıldı.
Nızam joybarınıń qabıl etiliwi xalıqtıń densawlıǵın hám tınıshlıǵın hár qanday zıyanlı shawqımlardıń tásirinen qorǵaw baǵdarında nátiyjeli huqıqıy mexanizmlerdi jaratıwǵa xızmet etetuǵını atap ótilip, úshinshi oqıwda da qabıl etildi hám Senatqa jiberildi.

ÓzA