Búgingi kúnde sociallıq tarmaqlar adamlar ushın málimleme almasıwdan tısqarı, ózin kórsetiw, biznes júrgiziw hám hár qıylı tarawlarda jańalıqlar jaratıw ushın da áhmiyetli maydan bolıp xızmet etpekte. Biraq, tilekke qarsı, bul platformalardıń jáne bir tárepi bar. Shańaraq, jeke turmıs hám eń názik qatnasıqlar ashıq dodalawǵa sebep bolıp, bul process kóbinese sociallıq tarmaq paydalanıwshıların eki tárepke ajıratadı. Máselen, belgili insanlardıń ajırasıwı, atastırıwınıń buzılıwı yamasa basqa shańaraqlıq jánjeller mıńlaǵan, hátteki millionlaǵan adamlar tárepinen talqılanadı. Bul jaǵday adamlardıń óz jeke turmısı menen shuǵıllanıwdıń ornına, basqa adamlardıń jeke turmısına qızıǵıwshılıǵın arttıradı. Sonday-aq, kópshilik ózin “ádillik perishtesi” sıpatında tutıp, táreplemelik etedi yamasa belgili táreplerdi qaralaydı.

Insan tábiyatında basqalardıń ómirin baqlaw, olardıń mashqalaların talqılaw qızıǵıwshılıq oyatadı. Bul qızıǵıwshılıq kóbinese jeke turmısındaǵı mashqalalar, narazılıqlar yamasa zerigiw seziminen kelip shıǵadı. Sociallıq tarmaqlar bolsa bunday qızıǵıwshılıqtı jáne de kúsheytip, basqa adamlardıń turmısına kirip barıw imkaniyatın jaratadı. Biraq, mashqala sonda, adamlar kóbinese tolıq maǵlıwmatqa iye bolmay turıp, jaǵdaydı nadurıs talqılaydı yamasa óz táreplerin qorǵaw ushın tiykarsız pikirler bildiredi.
Tarmaqlarda pikir bildiriw ańsat bolıp qalǵanı ushın kópshilik óz sózleriniń aqıbetin hár dayım esapqa almaydı. Jeke turmısqa aralasıw, anıq emes hám nadurıs maǵlıwmatlar tarqatıw kóplegen zıyanlı aqıbetlerge alıp keledi. Bul tek ǵana belgili shaxslardıń ruwxıy dúnyasına tásir etip qoymastan, al jámiyette isenim hám húrmet ortalıǵın da buzadı.
Sociallıq tarmaqlarda waqıt hám energiya ósek, tárepdarlıqlarǵa jumsalıp atırǵanı, sonıń menen birge, jańa ideyalar, sociallıq joybarlar, unamlı ózgerisler ushın potencialdıń joǵaltılıwına da sebep bolıwı múmkin. Júdá ápiwayı hám tek ǵana shańaraqqa tiyisli bolǵan mashqalalardı dodalawǵa birlesken adamlardıń jumsaǵan waqtı hám energiyası, tiykarınan ulıwma jámiyetlik máseleler, saylawlar, ekonomikalıq joybarlar, sociallıq rawajlanıw ushın jumsalıwı múmkin edi. Eger adamlar jeke turmıstaǵı óseklerden kóre, jámiyet paydasına isleytuǵın máselelerge qızıǵıwshılıq bildirse, búgingi kúnde jáne de kóbirek sociallıq, siyasiy hám ekonomikalıq rawajlanıwǵa erisiw múmkin bolar edi.
Házirgi waqıtta hár bir insan óziniń turmısınıń jekeligin hám húrmet etiliwin talap etiwge haqılı. Jámiyette jeke turmıs hám oǵan aralasıw haqqında anıq shekler ornatılıwı zárúr. Óz turmısımızǵa tiyisli mashqalalardı ashıqtan-ashıq dodalawdı qálesek te, basqalardıń jeke turmısın húrmet etiw hám jeke turmısı haqqında artıqsha sóylemew minnetlememiz bar.
Tarmaqlarda keń tarqalǵan nadurıs pikirler jámiyettiń normaların buzadı hám ádep-ikramlılıq qádiriyatların tómenletedi. Jeke kelispewshilikler kópshilikke kórsetilgende, sociallıq tarmaqlar arqalı eki tárepleme bóliniw hám kelispewshiliklerdiń kúsheyiwi jámáátlik awızbirshiliktiń buzılıwına sebep boladı.
Sociallıq tarmaqlar insan turmısınıń barlıq tarawlarına tásir etpekte. Olardıń unamlı tárepleri kóp bolıwına qaramastan, jeke turmısqa biykarǵa aralasıw, bir táreplemelik hám nadurıs pikir bildiriw jámiyettiń ruwxıy dúnyasına hám rawajlanıwına unamsız tásir etedi. Sol sebepli, hár bir paydalanıwshı hám platforma sociallıq tarmaqlardıń unamsız aqıbetlerin azaytıwǵa umtılıwı, jeke ómirdi húrmet etiwi hám jámiyettiń ulıwma máplerine xızmet etetuǵın jumısqa itibar qaratıwı zárúr. Tek ǵana solay qatnas jasaw arqalı biz erteńgi turaqlı hám abadan jámiyetti qurıwımız múmkin.

Dildora DWSMATOVA, ÓzAnıń xabarshısı