Oliy Majlis Senatınıń Baslıǵı Tanzila Norboeva BMShtıń Ózbekstandaǵı turaqlı koordinatorı Sabine Mahl menen ushırastı.

Onda BMSh Bas Assambleyası 80-sessiyasınıń tabıslı ótkerilgeni hám Ózbekstan Prezidenti tárepinen alǵa qoyılǵan baslamalar xalıqaralıq jámiyetshiliktiń rawajlanıwı ushın áhmiyetli ekeni ayrıqsha atap ótildi. Bul baslamalar tiykarında keleshektegi rejelerdi belgilew hám olardıń orınlanıwın támiyinlew boyınsha pikir alısıldı.
Ózbekstannıń BMSh hám onıń qánigelesken uyımları menen birge islesiwiniń házirgi jaǵdayı hám perspektivaları dodalandı. Tiykarǵı itibar Turaqlı rawajlanıw maqsetlerine erisiw, gender teńlikti támiyinlew máselelerine qaratıldı.
Jańa Ózbekstandı qurıw jolındaǵı reformalar Turaqlı rawajlanıw maqsetlerine tolıq sáykes halda alıp barılıp atırǵanı atap ótildi.
Birge islesiwdi bunnan bılay da keńeytiw, turaqlı rawajlanıw boyınsha belgilengen milliy maqsetlerge erisiw boyınsha ámelge asırılıp atırǵan jumıslar boyınsha parlamentlik tıńlawlar processlerine BMSh institutların da tartıw máseleleri kórip shıǵıldı. Onda, ásirese, maqset hám wazıypalardıń aymaqlarda orınlanıwına ayrıqsha itibar qaratıldı.
Jaslardı Turaqlı rawajlanıw maqsetlerine erisiw processlerine jedel tartıw ushın kelesi jılı Samarqand qalasında shólkemlestiriw názerde tutılǵan Jaslar parlamentleri global forumı sheńberinde TRMǵa erisiwde parlamentleraralıq birge islesiw boyınsha III globallıq forumdı ótkeriwge baylanıslı perspektivadaǵı rejeler dodalandı.
Region mámleketleri basshılarınıń 7-Másláhát ushırasıwı sheńberinde 2025-jıl noyabr ayında Oraylıq Aziya mámleketleri hayal-qızlarınıń sóylesiwiniń gezektegi májilisin ótkeriw rejeleri de kórip shıǵıldı. Bul format hayal-qızlardıń huqıqların alǵa qoyıw hám olardıń turaqlı rawajlanıwdaǵı rolin bekkemlew tarawında tájiriybe almasıw ushın nátiyjeli maydan sıpatında ózin kórsetti.
Usı jılı “Samarqand marafonı – 2025” sheńberinde “Gender zorlıqqa qarsı 16 kúnlik jedel háreketler” kampaniyasın baslaw baslaması da dodalandı. Akciya “Hayal-qızlarǵa bolǵan sanlı zorlıqqa qarsı birleseyik!” súreni astında ótkeriledi.
BMSh penen birgelikte xalıqaralıq ekspertlerdiń qatnasıwında seminar yamasa dógerek sáwbetin shólkemlestiriw, sonday-aq, bul tarawdaǵı milliy nızamshılıqtı jetilistiriw imkaniyatların kórip shıǵıw usınıs etildi.

N.Abduraimova, ÓzA