Ózbekstan Respublikası Prezidenti Shavkat Mirziyoev 5-oktyabr kúni bolıp ótken telefon arqalı sóylesiwde Tájikstan Respublikası Prezidenti Emomali Rahmondı tuwılǵan kúni menen qızǵın qutlıqlap, oǵan bekkem densawlıq hám baxıt-ıǵbal, dos Tájikstan xalqına abadanlıq hám turaqlı rawajlanıw tiledi.

Mámleketimiz basshısı Tájikstan Prezidentiniń mámleket ǵárezsizligin bekkemlew, turaqlı rawajlanıwın támiyinlew hám xalıqaralıq abırayın arttırıwdaǵı ornın atap ótip, Ózbekstan menen Tájikstan arasında doslıq, jaqsı qońsıshılıq hám awqamlaslıq qatnasıqların bekkemlewge qosqan jeke úlesin ayrıqsha atap ótti.
Joqarı dárejedegi kelisimlerdi ámelge asırıw sheńberinde kóp táreplemeli sheriklikti bunnan bılay da keńeytiwdiń áhmiyetli máseleleri kórip shıǵıldı.
Sawda, sanaat kooperaciyası, transport, energetika, awıl xojalıǵı, turizm, mádeniy-gumanitarlıq almasıw sıyaqlı tiykarǵı baǵdarlardı qamtıp alǵan ámeliy birge islesiwdiń jańa kún tártibin qáliplestiriw boyınsha birgeliktegi jumıslardı dawam ettiriwge ayrıqsha itibar qaratıldı.
Mámleketlerimizde ótkeriliwi rejelestirilgen joqarı dárejedegi eki hám kóp tárepleme ilajlardıń rejesi hám kún tártibi de dodalandı.