Mámleketimiz basshısınıń baslaması menen 2021-2022-oqıw jılınan baslap elimizde Ózbekstan Respublikası Prezidenti sıylıǵı ushın «Shet tillerin oqıtıw boyınsha eń jaqsı mektep» tańlawı ótkerilip kelinbekte.

Kegeyli rayonı 55-sanlı ayırım pánler tereńlestirilip oqıtılatuǵın ulıwma orta bilim mektebi oqıwshıları bul tańlawda hár jıl sayın belsendilik kórsetip, rayon kóleminde birinshi, respublika kóleminde sıylı orınlardı iyelep kelmekte. Al, ótken jılı usı tańlawdıń Qaraqalpaqstan Respublikası basqıshında qatnasıp, birinshi orındı iyelewge miyasar boldı hám 250 mln sum aqsha menen Ullı Britaniya mámleketine bilimlendiriw saparına biypul jollamanı qolǵa kirgizgen edi.
Házirgi kúnleri jeńimpaz bolǵan 55-sanlı mektep oqıwshıları óz ustazı menen birgelikte Ullı Britaniyada bilimlendiriw saparında bolıp tur.
– «Shet tillerin oqıtıw boyınsha eń jaqsı mektep» tańlawında eki jılı respublikada úshinshi, bir márte ekinshi orındı iyelegen edik. Al, ótken jılı birinshi orındı jeńip alıwǵa miyasar boldıq hám ulıwma tańlaw baslanǵanlı berli mektebimiz oqıwshıları jámi 1mlrd 150 mln sum aqsha utıp aldı, – deydi usı mektep direktorı Qaraqalpaqstan hám Ózbekstan Respublikaları Xalıq bilimlendiriwiniń aǵlası, «Watan pidayısı» kókirek belgisi iyesi Axmet Utepbergenov. – Bul sayaxat oqıwshılardıń keleshekte jetik qánige bolıp jetilisiwine túrtki bolıp, jaratılıp berilip atırǵan bunday imkaniyatlar olardıń yadında bir ómir saqlanadı hám olardıń bilim alıwında jáne bir úlken xoshamet bolıp xızmet etedi.
Bilimlendiriw saparında oqıwshılar sırt elliler menen mámleketimizdiń tariyxı, milliy qádiriyatlarımız haqqında inglis tilinde sáwbetler ótkermekte. Bunday tariyxıy waqıyadan kegeylishi jaslar oǵada quwanıshlı hám Mámleketimiz basshısına bilimlendiriwge berilip atırǵan itibar ushın óz minnetdarshılıǵın bildirmekte.

Adilbay Orazov,
Qaraqalpaqstan xabar agentligi sholıwshısı.