Ádillik ministrliginde “Ózbekstannıń Jáhán sawda shólkemi (JSSh)ne qosılıwı: shólkem qaǵıydaları tiykarında eksporttı ámelge asırıw” atamasında seminar shólkemlestirildi.

Sawda-sanaat palatası menen birgelikte shólkemlestirilgen ilajda qánigeler, eksport jumısı menen shuǵıllanıwshı isbilermenlik subektleri qatnastı.
Ózbekstannıń JSShǵa aǵza bolıwı sharayatında eksport jumısı menen shuǵıllanıwshı isbilermenlik subektlerin ámelge asırılıp atırǵan reformalardan xabardar etiw arqalı olardıń jumısına járdemlesiw maqsetinde shólkemlestirilgen ilajda bul baǵdardaǵı tiykarlar haqqında sóz etildi.
Prezidentimizdiń 2024-jıl 30-avgusttaǵı “Ózbekstan Respublikası Prezidentiniń isbilermenler menen tórtinshi ashıqtan-ashıq sóylesiwinde belgilengen wazıypalardı ámelge asırıw ilajları haqqında”ǵı pármanında 2024-2025-jıllarda jergilikli sanaat tarmaqları xızmetkerleri tárepinen aymaqlardaǵı eksportı 1 million AQSh dollarınan joqarı bolǵan kárxanalardı JSSh talaplarına beyimlestiriwge kómeklesiwdi shólkemlestiriw wazıypası belgilengen.
Bul tapsırmanıń orınlanıwın támiyinlew boyınsha Ádillik ministrligi hám Sawda-sanaat palatası tárepinen eksport jumısın ámelge asırıwshı isbilermenlik subektleriniń juwapker xızmetkerleri JSShnıń eksport boyınsha qaǵıyda hám normaları menen tanıstırıldı. Eksport tarawındaǵı milliy nızamshılıqtaǵı ózgerislerden xabardar etildi.
Atap aytqanda, JSShnıń eksport tarawındaǵı qaǵıydaları, bajıxana nızamshılıǵı hám sawda tártip-qaǵıydaların ápiwayılastırıw boyınsha ámelge asırılıp atırǵan jumıslar, texnikalıq jaqtan tártipke salıw tarawında ámelge asırılıp atırǵan reformalar, eksport penen baylanıslı sanitariyalıq-epidemiologiya, ósimlikler karantini, veterinariya máseleleri, intellektuallıq múlk huqıqlarınıń eksport jumısındaǵı áhmiyeti túsindirildi.
Seminar dawamında isbilermenler ushın tema boyınsha óz pikir-usınısların bildiriw imkaniyatı jaratıldı. Bunnan tısqarı, seminar juwmaǵında isbilermenler ózlerin qızıqtırǵan máseleler boyınsha juwapker shólkemlerdiń wákillerinen juwaplar aldı.

N.Abduraimova, ÓzA