“Mámleketlik uyımnıń yamasa onıń lawazımlı shaxsınıń nızamǵa qayshı qararı, háreketi yamasa háreketsizligi sebepli jetkerilgen zıyannıń ornın qaplaw haqqında”ǵı nızam qabıl etiliwi kútilmekte.

Bul nızam Senattıń Sud-huqıq máseleleri hám korrupciyaǵa qarsı gúresiw komitetiniń májilisinde dáslepki tárizde dodalandı.
Nızam menen múlklik zıyandı qaplaw ushın aymaqlıq maqsetli qorlardıń qarjıların qáliplestiriw hám olardıń derekleri belgilenbekte.
Jetkerilgen zıyannıń ornın qaplaw ushın óndiriletuǵın qarjılardıń muǵdarı sudtıń qararı tiykarında anıqlanıwı, qorlardıń qarjılarınan paydalanıw haqqında Ministrler Kabinetine, Qaraqalpaqstan Respublikası Joqarǵı Keńesine, aymaqlıq keńeslerge dáwirlik esabat usınıp barılıwı, aymaqlıq hákimlikler zıyandı qaplaw ushın tólengen qarjılardı regress tártibinde óndiriw ilajların kóriwi belgilenbekte.
Nızam puqaralar hám isbilermenlerdiń buzılǵan huqıqların tiklew, lawazımlı shaxstıń jeke juwapkershiligin arttırıw jáne mámleketlik uyımlardıń jumısında ashıq-aydınlıqtı támiyinlewge xızmet etetuǵını senatorlar tárepinen ayrıqsha atap ótildi.
“Jergilikli mámleketlik hákimiyat uyımlarınıń jumısı jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam menen jergilikli keńeslerge hákimliklerdiń ayırım wákillikleri hám nızam hújjetlerinde jergilikli mámleketlik hákimiyat uyımlarına berilgen ulıwma wákilliklerdiń anıqlastırılıwı nátiyjesinde qosımsha wákillikler ótkerilmekte.
Jergilikli mámleketlik hákimiyat uyımlarına júklengen wazıypalar hám funkciyalar jergilikli wákillikli uyımlar hám atqarıwshı hákimiyat uyımları arasında qánigelestirilmekte.
“Hákimshilik tártip-qaǵıydalar haqqında”ǵı nızamdı kórip shıǵıw dawamında onıń qollanıw tarawı keńeytilip atırǵanı atap ótildi. Nızam salıq, bajıxana, mámleketlik qadaǵalaw hám tekseriw, puqaralardıń pensiya támiynatı, áskeriy dizimge alıw hám áskeriy xızmetke shaqırıw, qala qurılısı jaǵınan rejelestiriw, jer uchastkaların ajıratıw hám alıp qoyıw sıyaqlı tártip-qaǵıydalarǵa qollanılıwı belgilenbekte.
Nızam boyınsha komitet aǵzaları hám ekspertler tárepinen bir qatar usınıslar bildirilip, onı tereń úyrenip, tallaw zárúr ekenligi atap ótildi. Kórip shıǵılǵan nızamlar boyınsha komitettiń tiyisli qararları qabıl etildi.

N.Abduraimova, ÓzA