Bizge belgili, jaqında Xorvatiyanıń Zagreb qalasında bolıp ótken jáhán chempionatında grek-rim gúresi boyınsha Tashkent wálayatınıń perzenti Aytjan Xalmaxanov altın medaldı qolǵa kirgizgen edi. Bunday jetiskenlik penen ol 24 jıllıq tánepisten soń usı baǵdarda jáhán chempionı bolǵan birinshi ózbekstanlı sportshı sıpatında tariyxqa mórlendi.

Usı múnásibet penen chempionǵa mámleketimiz basshısı tárepinen «Nurafshon Sity” aymaǵında jaylasqan kóp qabatlı turaq jaylardan úsh bólmeli kvartira tapsırıldı. Ilajǵa wálayat hám Nurafshan qalası, Orta Shırshıq rayonınıń belsendileri, nuraniylar hám jaslar, sportshınıń shańaraq aǵzaları hám jaqınları qatnastı. Hámme birgelikte jańa shańaraqta miyman boldı.

Wálayat hákimi Z.Mirzaev belsendiler menen birgelikte sportshı hám shańaraq aǵzaları menen sáwbetlesip, onıń jetiskenliklerin atap ótti, aldaǵı jumısına áwmet tiledi. Jas sportshınıń xalıqaralıq maydanlarda elimizdiń abırayın joqarı dárejede qorǵap atırǵanı, joqarı sheklerge qaray umtılıp, jaslar ushın úlgi bolıp atırǵanın ayrıqsha atap ótti.

– Bárinen burın, Prezidentimizge, xalqımızǵa úlken raxmet, – deydi Aytjan Xalmaxanov. – Erisip atırǵan jetiskenliklerime ustazlarım, ata-anam hám shańaraǵımdaǵılar oǵada quwanıshlı boldı. Bul maǵan úlken juwapkershilik júkleydi. Bunnan keyin de jáne de úlken isenim menen háreket etemen. Aldaǵı gezektegi Olimpiada oyınlarında da joqarı nátiyjelerge erisiw niyetindemen.
Ilaj dawamında belsendiler de ózleriniń jaqsı tileklerin bildirdi. Nuraniylar pátiya etip, sportshınıń keleshektegi jumısına áwmet tiledi.

Abdulaziz MUSAEV,
ÓzAnıń xabarshısı