Ózbekstan Xalıq demokratiyalıq partiyası Qaraqalpaqstan Respublikalıq Keńesi tárepinen jaslardıń mashqalaların úyreniw maqsetinde Nókis qalasındaǵı «Nawrız» mákan puqaralar jıyını jasları menen ushırasıw bolıp ótti.

Ózbekstan Respublikası Prezidentiniń 2025-jıl 10-sentyabrdegi “Máhállelerde jaslar menen islesiw sistemasınıń nátiyjeliligin arttırıwǵa baylanıslı ilajlar haqqında”ǵı pármanında belgilengen wazıypalardıń orınlanıwın támiyinlew, pármandı jaslarǵa keńnen úgit-násiyatlaw sheńberinde shólkemlestirilgen ilajda Ózbekstan XDP Qaraqalpaqstan Respublikası Keńesi Jaslar hám hayal-qızlar menen islesiw bólimi baslıǵı G.Dalibaeva, Xalıq deputatları Nókis qalalıq Keńesi deputatı D.Xasanova hám basqalar máhállelerdegi jaslar jetekshileri, aymaqtaǵı jaslar menen sáwbetlesti.
Pármanǵa muwapıq, jaslardıń mashqalaları menen individual hám mánzilli islesiw arqalı jaslar jetekshileriniń jumıs nátiyjeliligin arttırıw, jaslardıń kásiplik qızıǵıwshılıqların erte anıqlaw arqalı miynet bazarına básekige shıdamlı kadr sıpatında kirip keliwin támiyinlew máseleleri, sonday-aq, partiyanıń maqset hám wazıypaları haqqında keńnen túsinik berildi.
Ushırasıwda jaslar mámleketimizde olar ushın jaratılıp atırǵan sharayatlar, múmkinshilikler hám jeńillikler boyınsha keń túrde maǵlıwmat aldı. Jaslardıń pikir-usınısları tıńlanıp, qızıqtırǵan sorawlarına juwap berildi.
Usınday ilaj «Bereket» mákan puqaralar jıyını aymaǵındaǵı «Darbent» baslanǵısh partiya shólkeminde de ótkerilip, onda «Gúzar», «Bereket» mákan puqaralar jıyınlarınıń jasları qatnastı. Ilaj sheńberinde partiya qatarına jańadan qabıl etilgen aǵzalarǵa partiyanıń aǵzalıq gúwalıqları tapsırıldı.

Qaraqalpaqstan xabar agentligi