Oliy Majlis Senatına Iran islam keńesi májilisiniń deputatı hám “Iran-Ózbekstan” parlamentleraralıq doslıq toparınıń baslıǵı Javad Nikbin keldi.

Senat Baslıǵı Tanzila Norboeva menen ushırasıwda Javad Nikbin Ózbekstanda sońǵı jıllardaǵı unamlı ózgerisler, keń kólemli reformalar, Prezidenttiń xalıqaralıq maydandaǵı dana siyasatı sebepli regiondaǵı doslıq ortalıǵı rawajlanıp atırǵanın ayrıqsha atap ótti.
Tárepler eki mámleket basshılarınıń siyasiy erk-ıqrarı hám háreketleri tiykarında keyingi jıllarda Ózbekstan hám Iran arasında kóp qırlı birge islesiw qatnasıqları jedel rawajlanıp, jańa basqıshqa kóterilgenin ayrıqsha atap ótti.
Eki mámleket arasındaǵı parlamentleraralıq birge islesiwdi bunnan bılay da jedellestiriw hám parlamentleraralıq baylanıslardı bekkemlewge ayrıqsha itibar qaratıldı. Keyingi jıllarda parlamentleraralıq baylanıslardıń jedelleskeni, parlament basshılarınıń turaqlı sóylesiwi hám óz-ara sapar etiwleri eki tárepleme qatnasıqlardı bekkemlewge xızmet etip atırǵanı atap ótildi.
Ushırasıwda qáwipsizlik, sawda-ekonomikalıq, investiciya, transport hám turizm tarawlarında birge islesiwdi keńeytiw jáne bul tarawlarda mámleket basshıları hám húkimetler arasında erisilgen kelisimlerdiń ámelge asırılıwın qatań parlamentlik qadaǵalawǵa alıw áhmiyetli ekenligi atap ótildi.
Sonıń menen birge, Iran menen medicina, nanotexnologiya baǵdarlarında tájiriybe almasıw, Ózbekstannıń teńizge shıǵıw jolında Iran portlarınan paydalanıw imkaniyatları haqqında da pikir alısıldı.
Ózbekstan hám Iran wálayatları arasında mádeniy-gumanitarlıq, ekonomikalıq-sociallıq baǵdarlarda aymaqlararalıq baylanıslardı jolǵa qoyıw máseleleri de dodalandı.
Ushırasıw juwmaǵında aldaǵı rejeler hám joybarlardı turmısqa engiziwde birge islesiw baylanısların jáne de bekkemlewge kelisip alındı.

N.Abduraimova, ÓzA