Mámleketimiz jasların qollap-quwatlaw, olar ushın keń imkaniyatlar esigin ashıwǵa tiykarǵı áhmiyet qaratılıp kelinbekte. Bunıń nátiyjesinde búgin jas áwlad wákilleriniń erisip atırǵan jetiskenlikleriniń kólemi keńeyip barmaqta.

Oliy Majlis Nızamshılıq palatasında Jaslar máseleleri boyınsha komissiya hám Jaslar parlamenti aǵzalarınıń Túrkiya Respublikası jaslar delegaciyası wákilleri menen ushırasıwı bolıp ótti.
Keyingi jılları eki mámleket arasındaǵı birge islesiw barlıq baǵdarlarda, sonıń ishinde, jaslar siyasatında da keńnen rawajlanıp atırǵanın atap ótiw kerek. Prezidentler dárejesindegi turaqlı sóylesiw hám birgeliktegi baǵdarlamalar nátiyjesinde jaslar ushın bilimlendiriw, innovaciya, mádeniy-gumanitarlıq birge islesiw, startaplar hám studentler almasıwı tarawında jańa imkaniyatlar jaratılmaqta.
Ushırasıw dawamında eki mámlekettiń jaslarǵa baylanıslı mámleketlik siyasatınıń tiykarǵı baǵdarları, bilimlendiriw hám ilimiy-izertlew tarawındaǵı imkaniyatlar, innovaciyalıq joybarlar hám kreativ ekonomikanı rawajlandırıw máseleleri keńnen dodalandı.
Sonday-aq, Túrkiya hám Ózbekstan jaslarınıń óz-ara birge islesiwin tereńlestiriw, qospa jaslar forumları, studentler almasıw baǵdarlamaları hám jaslar startapların ámelge asırıw arqalı jaslar diplomatiyasın rawajlandırıw jolları belgilendi. Sport hám turizm baǵdarlarında qospa baslamalardı jolǵa qoyıw máselelerine de ayrıqsha itibar qaratıldı.
Sóylesiwde Túrkiya jaslar delegaciyasınıń wákilleri Ózbekstanda jaslarǵa qaratılǵan keń kólemli reformalardı joqarı bahaladı. Eki mámleket basshılarınıń óz-ara isenim hám doslıqqa tiykarlanǵan siyasiy birge islesiwi jaslar ushın da bekkem tiykar jaratıp atırǵanın atap ótti. Sonday-aq, eki mámleket jasları arasındaǵı sóylesiwdi jańa basqıshqa kóteriwge, ilimiy-innovaciyalıq hám isbilermenlik baǵdarında óz-ara birge islesiwdi kúsheytiwge tayar ekenligin bildirdi.
Ushırasıw juwmaǵında Ózbekstan hám Túrkiya jasların birlestiretuǵın bir qatar ámeliy baslamalardı qollap-quwatlaw, jaslar siyasatındaǵı strategiyalıq sheriklikti bunnan bılay da rawajlandırıw hám eki xalıq arasındaǵı doslıq baylanısların bekkemlewge kelisip alındı.

M.Komilova, ÓzA