Prezident Shavkat Mirziyoevtiń basshılıǵında 26-sentyabr kúni aymaqlarda paxta zúráátin jıynaw, gúzgi-qısqı máwsimge tayarlıq jaǵdayı, investiciya hám eksport kórsetkishleriniń orınlanıwı jáne “Jasıl mákan” ulıwma milliy joybarı sheńberindegi jumıslardı tallaw boyınsha keńeytilgen májilis bolıp ótti.

Májiliste aymaqlar kesiminde paxta jıyın-terimi pátleri hám orın alǵan mashqalalar hár tárepleme kórip shıǵıldı.
Bıyıl 875 mıń gektar maydanǵa shigit egilip, 3,7 million tonna ónim ushın shártnamalar dúzilgen. Terim processlerine 900 den aslam mashina tartıldı, fermerlerge janılǵı hám tógin arzanlastırılǵan tártipte berildi.
Sonıń menen birge, ayırım aymaqlarda rejeden artta qalıw jaǵdayları baqlanbaqta. Máselen, Surxandárya, Xorezm, Ferǵana hám Ándijan wálayatları jaqsı nátiyje kórsetip atırǵan bolsa, Samarqand, Sırdárya hám Nawayıda jaǵday qanaatlandırarsız.
Prezidentimiz qısqa waqıt ishinde orınlarda ayrıqsha shtablar dúzip, zúráátti sapalı jıynap alıw, fermerlerdi oylandırıp atırǵan máselelerdi jedel sheship barıw boyınsha kórsetpeler berdi. Juwapkerlerge terilgen paxta ushın esap-sanaqlar óz waqtında ámelge asırılıwın támiyinlew tapsırıldı.
Májiliste gúzgi-qısqı máwsimge tayarlıq jaǵdayı da kórip shıǵıldı.
Respublika boyınsha 640 mektep hám baqshalardan 125 inde ońlaw jumısları ele juwmaqlanbaǵan. 9,8 mıń kóp qabatlı jaydıń derlik mıńı tayar emes. Jizzaq hám Surxandáryadaǵı qazanxanalardıń ońlanıwı da juwmaǵına jetkerilmegen.
Mámleketimiz basshısı eki hápte ishinde bul máselelerdi sheshiw, podstanciya, elektr hám suw tarmaqların máwsimge tayar jaǵdayǵa keltiriw zárúr ekenligin atap ótti.
Sonday-aq, búgingi kúnde xalıqqa 55 mıń tonna, sonnan 381 alıs awıllarǵa 9 mıń tonna jergilikli kómir jetkerip berilgen. Xalıqqa qoymaxanalardaǵı 27 mıń tonna tarqatılmay qalǵan kómirdi hám gúzgi-qısqı máwsimde tutınıwshılarǵa 330 mıń tonna suyılttırılǵan gazdi tolıq jetkerip beriw tapsırıldı. Gaz hám elektr támiynatında úzilislerge jol qoymaw ushın juwapkerler jeke juwapker ekenligi kórsetip ótildi.
“Jasıl mákan” baǵdarlamasınıń orınlanıwı dodalanıp, bıyıl báhárde egilgen 137 million náldiń 27,5 millionı qurıp qalǵanı sınǵa alındı. Sebebi – báhár hám jaz ortasında ıssı kúnler tez kelip qalıwı aqıbetinde egilgen náller ónip úlgermey atır, olarǵa ádettegiden 2-3 ese kóp suw jumsawǵa tuwra kelmekte.
Usı múnásibet penen terekti gúzde egiwdi kóbeytiw zárúrligi kórsetip ótildi. Bıyılǵı gúz máwsiminde 125 million túp terek hám puta, báhárde jáne 75 million túp egiw rejelestirilgen. Onda suwǵarıw sisteması hám imkaniyatı joq jerlerge nál ekpew talap etip qoyıldı.
Urbanizaciya procesiniń tezlesip baratırǵanı qalalar hám wálayat oraylarında jasıllıq dárejesin arttırıwdı talap etpekte. Qalalardı “jasıl” standartlarǵa muwapıq ilimiy tiykarda rawajlandırıw maqsetinde ilimpazlar, urbanistler hám ekologlardıń qatnasıwında Tashkent hám Nókis qalaları, barlıq wálayat oraylarınıń “jasıl” master rejeleri islep shıǵılatuǵını belgilendi.
Usı jıldıń úshinshi shereginiń juwmaǵı menen elimizge tartılǵan sırt el investiciyalarınıń kólemi 33,5 milliard dollarǵa jetiwi kútilmekte. Yanvar-avgust aylarında eksport 23 milliard dollardı qurap, ótken jılǵa salıstırǵanda 31 procentke kóbeydi.
Biraq investiciyanıń ósiwi barlıq aymaqlarda da birdey emes. Ayırım aymaqlarda bolsa eksport kórsetkishleri tómenlegen. Prezident juwapkerlerden jıldıń aqırına shekem 7,3 milliard dollar qosımsha eksporttı támiyinlew, investiciyalardı tartıw hám jańa bazarlarǵa shıǵıw boyınsha anıq ilajlar kóriwdi talap etti.
AQSh shtatları menen birge islesiw jolǵa qoyılatuǵını belgilendi. Hár bir wálayat belgili shtat penen birge islesiw ornatıp, jergilikli isbilermenler hám sırt elli sherikler arasında tikkeley baylanıslardı keńeytiwge járdemlesiw zárúrligi atap ótildi.
Májilis juwmaǵında Prezident barlıq baǵdarlarda belgilengen wazıypalardı óz waqtında hám tolıq orınlaw boyınsha kórsetpeler berdi.

ÓzA