Bozataw rayonı Jaslar orayı imaratında Ózbekstan Respublikası Oliy Majlisi Nızamshılıq palatasınıń deputatı Sayyora Imamova aymaq turǵınları menen ushırastı.

Onda deputat S.Imamova mámleketimizde ámelge asırılıp atırǵan keń kólemli reformalar, jańalanıwlar, xalıqtıń sociallıq-ekonomikalıq jaǵdayın jaqsılaw baǵdarında shıǵarılıp atırǵan Prezidentimizdiń párman hám qararları, qabıllanıp atırǵan nızamlar haqqında keń túrde toqtap ótti.
Bunnan soń ushırasıw qatnasıwshıları tárepinen bildirilgen pikir hám usınıslar tıńlandı.
Sońınan ol rayonlıq mektepke shekemgi hám mektep bilimlendiriw bólimine qaraslı 8-sanlı mektepke shekemgi bilimlendiriw shólkeminde boldı hám bul jerde tárbiyalanıwshılar ushın jaratılǵan imkaniyatlar menen tanıstı.
Sonday-aq, xızmet saparı dawamında deputat 2-sanlı ulıwma orta bilim beriw mektebinde oqıwshılar ushın jaratılǵan qolaylıqlardı kózden ótkerdi hám hár bir sociallıq obektte gúzgi-qısqı máwsimge tayarlıq jumıslarınıń sapası, jılıtıw úskeneleriniń talap dárejesinde ekenligi, xanalardıń jıllılıq dárejesi úyrenildi.
Bunnan soń S.Imamova Bozataw rayonı aymaǵında jasawshı nuranıy ustaz Q.Allabaev hám M.Palwaniyazovlardıń shańaraqlarınan xabar alıp, olardı 1-oktyabr –«Muǵallimler hám ustazlar kúni» bayramı múnásibeti menen qızǵın qutlıqladı hám bayram sawǵaların tapsırdı.

Adilbay Orazov,
Qaraqalpaqstan xabar agentligi sholıwshısı.