Alımlar – túni-kúni izleniwden, miynetten toqtamaytuǵın, ilim jolındaǵı mashaqatlardı pisent etpeytuǵın insanlar. Olardıń mashaqatlı miynetleri aspan sırlarınan bizdi xabardar etedi, jer astına jasırınǵan tariyxtı janlandıradı.Mine, usınday alımlardan biri Ózbekstanda xızmet kórsetken ilim ǵayratkeri, akademik Ahmadali Asqarov.

Ózbekstan Respublikası Prezidentiniń pármanına bola Mámleketimizde ilim tarawın rawajlandırıw, elimizdiń bay tariyxın úyreniw hám úgit-násiyatlawǵa qosqan úlken úlesi, talantlı ilimpazlardı tayarlawdaǵı ibratlı jumısı ushın Tashkent mámleketlik pedagogikalıq universitetiniń professorı, akademik Ahmadali Asqarov “Buyuk xizmatlari uchun” ordeni menen sıylıqlandı.
Bul sıylıqtı ilimpazdıń tuwılǵan kúniniń 90 jıllıǵına baǵıshlap Ilimler akademiyasında ótkerilgen xalıqaralıq-ilimiy konferenciyada Prezident keńesgóyi Xayriddin Sultonov saltanatlı tapsırdı.
Bunnan soń akademik Asqarovtiń arxeologiya ilimindegi sheksiz xızmetleri, Ózbekstan hám Oraylıq Aziya tariyxınıń úyreniliwine qosqan úlesi kásiplesleri hám shákirtleri tárepinen ayrıqsha atap ótildi.
– Ahmadali Asqarov tek shágirtlerine ǵana emes, al tariyxqa qızıqqanlar, studentler, magistrlarǵa bilim berip, durıs joldı kórsete aladı, – deydi ilimpazdıń shákirti Tashkent Ámeliy ilimler universitetiniń professorı Nigora Egamberdieva. – Ustaz Ózbekstan tariyxı pánine de úlken jańalıqlar kirgizgen. Solardan eń áhmiyetlisi Ózbekstan mámleketshiligi tariyxınıń dáwirin 4 mıń jıllıq dep belgilep berdi. Bul, óz gezeginde Ózbekstan tariyxı páninde eń úlken burılıs esaplanadı. Ahmadali Asqarov pútkil ilimiy jumısı dawamında akademik Ya.Ǵ.Ǵulomov arxeologiyalıq ilimiy mekteptiń izbe-iz dawmashısı sıpatında arxeolog kadrlar tayarlaw jumısına ayrıqsha itibar berip keldi. Onıń jeke baslaması menen Rossiyanıń Moskva, Sankt-Peterburg, Novosibirsk sıyaqlı iri oraylarında onlaǵan ózbekstanlı jas qánigeler bilim aldı.
Sonday-aq, joqarı oqıw orınları ushın 2 qollanba, 4 oqıw qollanbası, 8 oqıw-metodikalıq jumıslar, orta mektep 5-klass tariyx páni oqıtıwshıları ushın qollanba tayarlap basıp shıǵardı. Bul qollanba qaraqalpaq, rus, tájik, qırǵız hám túrkmen tillerine awdarmalanıp, kóp nusqada mekteplerge jetkerildi. Ahmadali Asqarov háreketleri hám tikkeley basshılıǵında 1994-jılı “Ózbekstan tariyxı”nan orta mekteplerdiń 6-9-klass oqıwshıları ushın qollanbalar tayarlanıp, olar A.Asqarov redkollegiyası astında kóplegen nusqada baspadan shıǵarıldı. Usı jılı bolsa orta mekteptiń 5-klassları ushın “Tariyxtan gúrrińler” atamasındaǵı sabaqlıq jarattı.
Alımnıń bunday miynetleri tán alınıwı jaslar ushın ibrat mektebi bolıp, olardı ilimge qızıqtırıw, izleniwge umtıldıradı hám ilim xalqına bolǵan húrmet-izzetin kúsheytedi.

Nigora RAHMANOVA,
ÓzA