Ózbekstan Respublikası Prezidenti Shavkat Mirziyoev 23-sentyabr kúni Nyu-York qalasında BMSh Bas Assambleyasınıń 80-yubiley sessiyası sheńberindegi bir qatar mámleket basshıları hám BMSh Bas xatkeri menen ushırasıw ótkerdi.

Amerika Qurama Shtatları Prezidenti Donald Tramp penen ushırasıwda Ózbekstan – AQSh strategiyalıq sheriklik qatnasıqların jáne de keńeytiwdiń áhmiyetli máseleleri hám tiykarǵı baǵdarları tolıq dodalandı.
Regionallıq hám globallıq áhmiyetke iye aktual máseleler boyınsha pikir alısıldı. Usı jıl 5-sentyabr kúni bolıp ótken telefon arqalı sóylesiw juwmaǵında erisilgen kelisimlerdiń ámelge asırılıwı kórip shıǵıldı.
Sóylesiw aldınan mámleketimiz basshısı Prezident Donald Tramptı ishki hám sırtqı siyasattı ámelge asırıwdaǵı joqarı tabısları menen qızǵın qutlıqladı. Onıń xalıqaralıq hám regionallıq kólemdegi keskin kelispewshiliklerdi tınısh jol menen sheshiw baǵdarındaǵı jeke úlesi hám háreketleri ayrıqsha atap ótildi.
Óz gezeginde, AQSh jetekshisi Jańa Ózbekstanda ekonomikanı modernizaciyalaw, xalıqtıń abadanlıǵın arttırıw hám xalıqaralıq abıraydı joqarılatıwǵa qaratılǵan artqa qaytpaytuǵın reformalardı jáne bir márte qollap-quwatladı.
Hár qıylı dárejelerdegi siyasiy sóylesiw hám almasıwlar jedel rawajlanıp atırǵanı, isbilermenlik baylanısları jedelleskeni úlken qanaatlanıwshılıq penen atap ótildi.
AQSh Prezidenti kúni keshe Ózbekstan jetekshisiniń AQShtıń 50 den aslam iri kompaniya hám bankleriniń basshıları menen ótkergen ushırasıw hám sóylesiwlerdiń paydalı nátiyjelerin joqarı bahaladı.
Puqaralıq aviaciya, taw-kán sanaatı, áhmiyetli minerallar, qarjı, innovaciyalar, ximiya, energetika hám basqa da tiykarǵı baǵdarlarda shártnamalar hám perspektivalı joybarlar portfeli qáliplestirildi.
Bul joybar hám kelisimler eki elde on mıńlaǵan jańa jumıs orınların jaratatuǵını atap ótildi.
Sóylesiwler juwmaǵında mámleketimiz basshısı Prezident Donald Tramptı ózi ushın qolaylı múddette Ózbekstanǵa rásmiy sapar menen keliwge mirát etti.
Ózbekstan Respublikası Prezidenti Shavkat Mirziyoev hám AQSh Prezidenti Donald Tramptıń ushırasıwı ashıq, konstruktivlik hám doslıq ruwxında ótti.
Koreya Respublikası Prezidenti Li CHje Myon menen ushırasıwda Ózbekstan – Koreya ayrıqsha strategiyalıq sheriklik qatnasıqların bunnan bılay da bekkemlew hám kóp qırlı birge islesiwdi keńeytiw máseleleri kórip shıǵıldı.
Keyingi jıllarda óz-ara birge islesiwde úlken rawajlanıwǵa erisilgeni, barlıq dárejelerdegi almasıw hám sóylesiwler jedelleskeni qanaatlanıwshılıq penen atap ótildi.
Óz-ara sawda kórsetkishleri turaqlı artıp barmaqta. Koreya kompaniyalarınıń Ózbekstan ekonomikasına tikkeley investiciyalarınıń kólemi 8 milliard dollardan arttı.
Elimizde Koreya jetekshi joqarı bilimlendiriw mákemeleriniń 4 filialı, elimiz aymaqlarında professional bilimlendiriw orayları tabıslı jumıs alıp barmaqta.
Koreya xalıqaralıq birge islesiw agentligi, Koreya Eksimbanki hám onıń fondları menen kóp jıllar dawamında nátiyjeli sheriklik etip atırǵanı, joybarlardıń ulıwma portfeli 3,5 milliard dollarǵa jetkeni joqarı bahalandı.
Áhmiyetli shiyki zat resursların tereń qayta islew, ximiya, mashina qurılısı, awıl xojalıǵı, transport, aviaciya, biotexnologiyalar hám basqa da tiykarǵı baǵdarlardaǵı joybarlardı alǵa qoyıwdı názerde tutatuǵın jańa uzaq múddetli Texnologiya hám sanaat sherikligi baǵdarlamasın tayarlaw boyınsha kelisimge erisildi.
Usı mánide, Húkimetleraralıq komissiyanıń bolajaq májilisin nátiyjeli ótkeriw áhmiyetli ekenligi atap ótildi.
Regionallıq, sonıń ishinde, “Oraylıq Aziya – Koreya Respublikası” formatındaǵı birge islesiw máseleleri boyınsha pikir alısıldı.
Ushırasıw juwmaǵında mámleketimiz basshısı Koreya Prezidentin mámleketlik sapar menen Ózbekstanǵa keliwge mirát etti.
Albaniya Prezidenti Bayram Begay menen ushırasıwda siyasiy-diplomatiyalıq, sawda-ekonomikalıq hám mádeniy-gumanitarlıq tarawlarda óz-ara paydalı birge islesiwdi rawajlandırıw máseleleri kórip shıǵıldı.
Eki tárepleme qatnasıqlardı, sonıń ishinde, siyasiy sóylesiw hám ekonomikalıq birge islesiw mexanizmlerin jaratıw arqalı sapa jaǵınan jańa dárejege alıp shıǵıwǵa óz-ara qızıǵıwshılıq bildirildi.
Sawda hám investiciya tarawlarındaǵı birge islesiw potencialın júzege shıǵarıw, agrar hám azıq-awqat sanaatı, transport hám basqa da tarawlarda kooperaciya joybarların ámelge asırıw áhmiyetli ekenligi atap ótildi.
Jetekshiler regionallıq hám xalıqaralıq áhmiyetke iye máseleler boyınsha da pikir alıstı.
BMSh Bas xatkeri Antoniu Guterrish penen ushırasıwda Turaqlı rawajlanıw maqsetlerine erisiw boyınsha milliy wazıypalardı ámelge asırıw sheńberinde BMSh menen birge islesiwdi bunnan bılay da keńeytiw máseleleri kórip shıǵıldı.
Sóylesiw aldınan mámleketimiz basshısı Antoniu Guterrishti BMShtıń yubiley sessiyası menen qızǵın qutlıqlap, onıń shólkem sistemasın zamanagóy reallıqqa sáykes túrde reformalaw baǵdarındaǵı baslamaların qatań qollap-quwatladı.
Ózbekstan hám BMSh sherikliginde misli kórilmegen joqarı dárejege erisilgeni qanaatlanıwshılıq penen atap ótildi. 160 tan aslam baǵdarlama hám joybarlar tabıslı ámelge asırılmaqta. Oktyabr ayında bes jılǵa mólsherlengen jańa Birge islesiw baǵdarlamasına qol qoyılıwı kútilmekte.
Keyingi jılları Ózbekstannıń baslaması menen BMSh Bas Assambleyasınıń 13 rezolyuciyası qabıl etildi. Ózbekstan EKOSOS, Insan huqıqları boyınsha komitet, Statistika komissiyası sıyaqlı abıraylı strukturalarǵa aǵza etip saylandı.
Ózbekstannıń baslaması menen erteń BMSh bas rezidenciyasında balalar ragı hám basqa da awır keselliklerge qarsı gúresiw boyınsha joqarı dárejedegi forum bolıp ótedi. Samarqand qalasında YuNESKOnıń 43-Bas konferenciyasına qızǵın tayarlıq kórilmekte.
Antoniu Guterrish Ózbekstan Prezidentiniń Bas Assambleyanıń yubiley sessiyasındaǵı shıǵıp sóylegen sózine joqarı baha berip, onıń Turaqlı rawajlanıw maqsetlerine erisiw, Jańa Oraylıq Aziyanı qáliplestiriw, sanlı texnologiyalar hám jasalma intellekt, jaslar, aǵartıwshı islam dini hám basqa da tarawlarda global birge islesiwdi alǵa qoyıw baǵdarındaǵı baslamalarınıń áhmiyetin ayrıqsha atap ótti.
Ushırasıw juwmaǵında tiykarǵı baǵdarlarda keń kólemli sheriklikti rawajlandırıw, birge islesiwdiń jańa baǵdarlama hám joybarların islep shıǵıwǵa kelisip alındı.
Iordaniya Patshası Abdulla II ibn al-Husayn menen ushırasıwda usı jılı avgust ayında Ózbekstan Respublikasına ámelge asırılǵan joqarı dárejedegi sapar dawamında erisilgen kelisimlerdiń orınlanıwı dodalandı.
Ózbekstan hám Iordaniyanıń jetekshi kompaniyalarınıń qatnasıwındaǵı tiykarǵı investiciyalıq joybarlardı ámelge asırıwdı jedellestiriw boyınsha óz-ara muwapıqlasqan ilajlar kóriwge ayrıqsha itibar qaratıldı.
CHexiya Respublikası Prezidenti Petr Pavel menen ushırasıwda sawda-ekonomikalıq birge islesiwdi bunnan bılay da keńeytiw máseleleri kórip shıǵıldı. Sawda, investiciyalar, innovaciyalar, transport, awıl xojalıǵı hám basqa da tiykarǵı baǵdarlarda kooperaciyanı rawajlandırıw boyınsha anıq joybarlar dodalandı.
Uyımlararalıq baylanıslardı jedel dawam ettiriwge kelisip alındı.
Ózbekstan Respublikası Prezidenti Shavkat Mirziyoevtiń Amerika Qurama Shtatlarına ámeliy saparı dawam etpekte.

ÓzA