“Avtomobil jolları haqqında”ǵı nızam joybarı menen tólemli jollar tarmaǵın qurıwdıń huqıqıy tiykarları jaratılmaqta. Tólemli avtomobil jolların qurıwǵa tek ǵana alternativ tólemli háreketleniw jolı bar bolǵanda ǵana ruxsat beriledi.

Sonıń menen birge, tólemli avtomobil jolınan háreketleniw ushın tólem muǵdarı avtomobil jolları paydalanıwshılarınıń sociallıq-ekonomikalıq talapları qanaatlandırılıwın esapqa alǵan halda, ekonomikalıq jaqtan ózin aqlaytuǵın bolıwı kerek ekenligi názerde tutılmaqta.
Tólemli avtomobil jollarınan ishki isler, tez járdem, órt qáwipsizligi sıyaqlı arnawlı xızmetlerdiń mashinaları biypul paydalanıwı múmkin.
Bul nızam joybarı parlament tómengi palatasınıń májilisinde ekinshi oqıwda statyama-statya dodalandı.
Atap ótilgenindey, nızam joybarında “avtomobil jolların rejelestiriw” mexanizmin engiziw, jol infrastrukturasın xalıq hám ekonomikanıń ósip baratırǵan talaplarına sáykes halda rawajlandırıw názerde tutılmaqta. Sonday-aq, jollardı joybarlastırıwda xalıqtıń pikiri hám qorshaǵan ortalıqqa tásirin esapqa alıw jáne piyadalar ushın tosqınlıqsız ortalıqtı jaratıw boyınsha qatań talaplar ornatılmaqta.
Bunnan tısqarı, joybarda kommunikaciya tarmaqların qurıwda jollardıń burınǵı jaǵdayın tiklew qárejetlerin qaplaw shárti de kirgizilmekte. Jollarda úlken kólemli hám awır salmaqlı transport qurallarınıń háreketi tártipke salınbaqta. Qalaberdi, ajıratılǵan hám jol boyı aymaqlarında xızmet kórsetiw obektlerin jaylastırıwǵa baylanıslı talaplar belgilenbekte.
Nızam joybarındaǵı normalar jollardıń sapasın jaqsılaw arqalı ámeldegi avtomobil jolları tarmaǵın uzaq waqıtqa shekem saz halında saqlap turıw, tólemli jollar tarmaǵın qurıw, tarawǵa tikkeley sırt el investiciyaların tartıwǵa xızmet etedi.
Statyama-statya dodalawlardan soń, nızam joybarı deputatlar tárepinen qabıl etildi hám Senatqa jiberildi.

Muhtarama Komilova,
ÓzA