Oliy Majlistiń Insan huqıqları boyınsha wákili (Ombudsman) hám Qıynawlardıń aldın alıw boyınsha milliy preventiv mexanizmi sheńberinde jumıs alıp barıwshı jámiyetlik topar aǵzaları tárepinen háreketleniw erkinligi sheklengen shaxslar saqlanatuǵın jabıq mákemelerde monitoring saparları ámelge asırılmaqta.

Ombudsman málimleme xızmetiniń xabar beriwinshe, gezektegi monitoring saparı Qaraqalpaqstan Respublikasında ámelge asırıldı.
Úyreniw dawamında 2-sanlı tergew qamaqxanası, Xojeli rayonı ishki isler bólimi waqtınsha saqlaw qamaqxanası, Nókis qalalıq ishki isler uyımı jumısın muwapıqlastırıw bólimi waqtınsha saqlaw qamaqxanası, 27-sanlı mánzil-koloniya, hákimshilik qamaqqa alınǵan shaxslardı saqlaw ushın mólsherlengen arnawlı qabıllawxana, belgili bir jasaw ornına iye bolmaǵan shaxslardı reabilitaciyalaw orayı, máslik jaǵdayında bolǵan shaxslarǵa medicinalıq járdem kórsetiw punktleri, 1-sanlı ruwxıy-nerv kesellikleri dispanserindegi sharayatlar úyrenildi.
Monitoring saparı dawamında tergew hám waqtınsha saqlaw qamaqxanalarında saqlanıp atırǵan shaxslardıń jasaw, awqatlanıw hám medicinalıq xızmetten paydalanıw imkaniyatları kózden ótkerildi. Sonday-aq, kameralardıń jaǵdayı, baqlaw sistemaları, tekseriwden ótkeriw tártipleri hám medicinalıq xanalardıń jaǵdayı úyrenildi.
27-sanlı mánzil-koloniyasında miynetke jaramlı qamaqtaǵılardıń jumıs penen támiyinleniwi, awqatlanıw hám medicinalıq xızmetten paydalanıw tártibi, sonday-aq, qısqa hám uzaq múddetli ushırasıwlar ushın jaratılǵan sharayatlar kórip shıǵıldı.
Nókis qalasındaǵı más halında bolǵan puqaralarǵa medicinalıq járdem kórsetiw punkti, ruwxıy-nerv kesellikleri dispanseri hám reabilitaciya orayında bolsa puqaralardıń sociallıq, medicinalıq hám turmıslıq sharayatları kórip shıǵıldı.
Monitoring procesinde “Ombudsman qutısı”na kelip túsken múrájatlar kórip shıǵıldı, ayırım mákemelerde kóshpeli qabıllawlar ótkerilip, puqaralardıń múrájatları tıńlandı.
Sapar dawamında aldınǵı monitoringlerde berilgen usınıslardıń orınlanıwı támiyinlengen jaǵdaylar atap ótildi.
Monitoring nátiyjeleri boyınsha máslik jaǵdayında bolǵan shaxslarǵa medicinalıq járdem kórsetiw punktlerinde anıqlanǵan kemshilikler boyınsha tiyisli ministrlikler hám uyımlarǵa Ombudsmannıń tásir ilajları túrindegi hújjetler kirgizildi.

N.Abduraimova, ÓzA