Balalardıń huqıq hám máplerin támiyinlew, tálim-tárbiya procesinde olarǵa túrli kórinistegi zorlıq jaǵdaylarınıń aldın alıw búgingi kúnniń eń áhmiyetli máselelerinen birine aylandı. Ásirese, ata-ana qaramaǵınan ayrılǵan balalardıń huqıqların qorǵawǵa úlken áhmiyet qaratıw zárúr.

Balalardı tárbiyalaw, olarǵa bilim beriw baǵdarındaǵı minnetlemelerdi orınlamaw, tárbiya hám bilim beriw procesinde olarǵa zorlıq jaǵdayların islegenlik ushın hákimshilik juwapkershilik belgilenbekte.
Bunday tártipler “Balalardı sociallıq qorǵaw sistemasınıń jetilistiriliwi múnásibeti menen Ózbekstan Respublikasınıń ayırım hújjetlerine ózgerisler hám qosımshalar kirgiziw haqqında”ǵı nızam joybarında óz kórinisin tapqan.
Joybarda ózine júklengen minnetlemeni zárúr dárejede orınlamaǵanı ushın qáwenderlik, qayırqomlıq yamasa tutınǵan ata-analıq wazıypaların orınlawdan shetletilgen shaxslarǵa balalar perzentlikke berilmewi hám olar qáwender yamasa qayırqom etip tayınlanbawı názerde tutılmaqta. Ápiwayı etip aytqanda, balalardı tárbiyalawǵa uqıpsız bolǵan shaxslar perzentlikke alıw huqıqınan ayırıladı.
Sonday-aq, nızam joybarında notariuslarǵa balanı perzentlikke alıw, balanı qáwenderlikke beriw haqqındaǵı arzadaǵı balanıń haqıyqıylıǵın tastıyıqlaw boyınsha múrájat etilgeni haqqındaǵı maǵlıwmatlardı “Insan” sociallıq xızmetler oraylarına usınıp barıw minnetlemesi júklenbekte.
Bul hújjet balalardıń huqıqları menen máplerin nátiyjeli qorǵaw, olardıń shańaraq ortalıǵında tárbiyalanıwı ushın zárúr sharayatlar jaratıwǵa xızmet etedi.
Nızam joybarı Oliy Majlis Nızamshılıq palatasındaǵı siyasiy partiyalar frakciyalarınıń májilislerinde qızǵın dodalanıp, qollap-quwatlandı.

M.Komilova,
ÓzA