Sońǵı jılları elimizde isbilermenlikti qollap-quwatlaw hám olardıń jumısların bunnan bılay da rawajlandırıwǵa ayrıqsha dıqqat qaratılıp, bul baǵdarda kóplegen unamlı isler ámelge asırılmaqta.

Bul qolaylıqlardan nátiyjeli paydalanıp kiyatırǵan zamanlaslarımız ózleriniń biznes ideyaların tolıq ámelge asırıp, aymaqlarda xalıqtıń bántliginiń támiyinlewine hám sol arqalı mámleketimiz ekonomikasınıń bekkemleniwine óz úleslerin qosıp kelmekte.
Taxtakópirli Allayar Madreymov ta usınday záberdes isbilermenlerdiń biri. 2022-jılı rayondaǵı fermer xojalıqlarına texnikalıq servis, mineral tóginler jetkerip beriw hám biolaboratoriyalıq xızmet kórsetiw jumısı menen baslaǵan ol, keyin ala da óz isbilermenligin ele de keńeytiwge eristi. Atap aytqanda, isbilermen 2024-jılı «Agrobank»tiń jeńilletilgen krediti esabınan ulıwma bahası 32 mlrd sumlıq sharwashılıqtı rawajlandırıw hám sútti qayta islew joybarın ámelge asırıwǵa bel bayladı hám bunıń ushın burın islemey qalǵan sharwa kompleksin satıp aldı.
Sońınan sharwashalıq kompleksine sırt ellerdiń násilli 120 bas qaramalın alıp keliwge eristi.Sonday-aq, usı joybar tiykarında ulıwma bahası 500 mln sumlıq sútti qayta islew joybarın iske túsirip, 7 jańa jumıs ornın jarattı.
-Sharwashılıq kompleksinde Germaniya, Daniya hám Ukrainadan alıp kelingen 120 bas sawın sıyırlar kútimli baǵılmaqta,-deydi «Kausar Tegirmon» juwapkershiligi sheklengen jámiyetiniń sharwashılıq kompleksi is basqarıwshısı Baxtiyar Madreymov.-Jámiyettiń 400 gektar egislik jeri bolıp, bul jerlerden qara mallar ushın juǵımlı ot-shóp orıp jıynap alındı. Sútti qayta islew kárxanamızda búgingi kúni qadaqlanǵan sút, qatıq, smetana, yogurt hám tvorog islep shıǵarılmaqta.
Jámiyette usılar menen bir qatarda, ulıwma bahası 878 mıń dollarlıq júndi hám 46 mlrd sumlıq dándi qayta islew joybarları ámelge asırılmaqta.
-Bıyıl «A.Adilov» awıl puqaralar jıyını aymaǵınan Qıtay texnologiyası tiykarında júndi qayta islewshi kárxananı iske túsirdik,-deydi jámiyet baslıǵı Allayar Madreymov.-Aldaǵı waqıtları dándi qayta islew kárxanasın iske túsirip, xalqımızdı sapalı un ónimleri menen támiyinlewdi rejelestirip qoyıppız.
Haqıyqatında da, isbilermenniń aldaǵı waqıtları ámelge asırıwı tiyis bolǵan maqsetleri oǵada kóp. Olardı ámelge asırıw ushın Allayar Madreymovta bilim de, tájiriybe de jetkilikli.

Adilbay Orazov,
Qaraqalpaqstan xabar agentligi sholıwshısı