Ózbekstan Respublikası Prezidenti Shavkat Mirziyoev 22-sentyabr kúni Túrkmenstan Prezidenti Serdar Berdimuhamedov penen telefon arqalı sóylesti.

Mámleketimiz basshısı Túrkmenstan Prezidentin tuwılǵan kúni menen qızǵın qutlıqlap, oǵan bekkem densawlıq hám baxıt-ıǵbal, tuwısqan túrkmen xalqına tınıshlıq-tatıwlıq hám rawajlanıw tiledi.
Ózbekstan menen Túrkmenstan arasındaǵı doslıq, jaqsı qońsıshılıq hám strategiyalıq sheriklik qatnasıqların bunnan bılay da rawajlandırıw hám bekkemlewdiń áhmiyetli máseleleri kórip shıǵıldı.
Jedel siyasiy sóylesiw hám nátiyjeli uyımlararalıq baylanıslar jolǵa qoyılǵanı úlken qanaatlanıwshılıq penen atap ótildi.
Tovar almasıwdı kóbeytiw, sanaat hám energetikada kooperaciya joybarların alǵa qoyıw máselelerine ayrıqsha itibar qaratıldı. “Shavat-Tashawız” sawda zonasınıń qurılısı juwmaqlanbaqta. Ózbekstanda Aymaqlar forumı, kórgizbe, Túrkmenstan mádeniyatı hám kinosı kúnlerin ótkeriw rejelestirilgen.
Regionallıq kún tártibiniń áhmiyetli máseleleri hám bolajaq joqarı dárejedegi ilajlar rejesi de kórip shıǵıldı.
Sóylesiw sońında mámleketimiz basshısı Túrkmenstan Prezidenti hám xalqın jaqınlasıp kiyatırǵan Ǵárezsizlik kúni menen qızǵın qutlıqladı.

ÓzA