Oliy Majlis Senatı Baslıǵınıń birinshi orınbasarı Sodiq Safoev basshılıǵındaǵı Ózbekstan delegaciyası Amerika Qurama Shtatları (AQSh)nıń Yuta shtatında siyasiy, ekonomikalıq hám ilimiy toparlar wákilleri menen ushırasıwlar ótkerdi.

Yuta Senatınıń prezidenti Styuart Adams penen bolıp ótken ushırasıwda eki tárepleme birge islesiw baylanısların keńeytiw, investiciyalardı jedel tartıw hám innovaciyalıq joybarlardı ámelge asırıw máseleleri dodalandı.
Ózbekstanǵa Yuta tájiriybesin engiziw, atap aytqanda, taw-kán sanaatı, siyrek ushırasatuǵın metallardı qazıp alıw hám qayta islew, sonday-aq, elektrotransport ushın batareya hám yarımótkizgishler islep shıǵarıw boyınsha birgeliktegi joybarlar boyınsha usınıslar alǵa qoyıldı.
Aralboyı aymaǵında ekologiyalıq mashqalalardı sheshiwde Yuta shtatınıń ilimiy-metodikalıq tájiriybesinen paydalanıw, artemiya jetistiriw boyınsha birgeliktegi joybarlardı ámelge asırıw máseleleri de kórip shıǵıldı.
Ózbekstan delegaciyası Yuta shtatı universitetleriniń basshıları menen bolıp ótken ushırasıwda birgeliktegi bilimlendiriw baǵdarlamaları hám studentler almasıw joybarların ámelge asırıw máselelerin dodaladı.
Tárepler Ózbekstan hám Yuta shtatı arasında ekonomika, bilimlendiriw hám mádeniyat tarawlarında birge islesiwdi bunnan bılay da kúsheytiwge tayar ekenin bildirdi.

N.Abduraimova,
ÓzA