Ózbekstan Respublikası Prezidenti Shavkat Mirziyoev Birlesken Milletler Shólkemi Bas Assambleyasınıń 80-yubiley sessiyasınıń ilajlarında qatnasıw ushın 20-24-sentyabr kúnleri ámeliy sapar menen Nyu-York qalasında boladı.
Mámleketimiz basshısı BMSh Bas Assambleyası jalpı sessiyasınıń ulıwma dodalawlarınıń birinshi kúninde shıǵıp sóyleydi.

Bas Assambleyanıń bıyılǵı yubiley sessiyasında global qáwipsizlik hám turaqlılıqtı támiyinlew, Turaqlı rawajlanıw maqsetlerine erisiw, BMSh sisteması hám xalıqaralıq finans arxitekturasın reformalaw, klimat ózgeriwi aqıbetleri hám basqa da zamanagóy qáwip-qáterlerge qarsı gúresiwdiń áhmiyetli máseleleri kórip shıǵılatuǵının atap ótiw kerek.
Sammit sheńberinde Ózbekstan jetekshisi BMSh Bas xatkeri Antoniu Guterrish, sırt mámleketler hám húkimetler, abıraylı xalıqaralıq finans institutlarınıń basshıları menen sóylesiwler ótkeredi.
Sapar etiw baǵdarlamasınıń isbilermenlik bóliminen AQShtıń jetekshi kompaniyaları hám finanslıq-investiciyalıq strukturalarınıń qatnasıwında ushırasıw hám ilajlar orın alǵan. Jańa kelisim hám shártnamalar toplamına qol qoyılıwı kútilmekte.

ÓzA