Respublikamız boylap qáwipsiz ortalıqtı jaratıw maqsetinde barlıq basshılar «qızıl» dárejege kirgizilgen máhállelerge biriktirilgen bolıp, aymaqta kriminogen jaǵdaydı jaqsılaw baǵdarında anıq reje tiykarında jumıslar shólkemlestirilmekte.

Atap aytqanda, orınlarda kriminogen jaǵdaydı turaqlastırıw hám qáwipsiz ortalıqtı jaratıw maqsetinde Qaraqalpaqstan Respublikası prokurorı Sh.Aminov Nókis qalasındaǵı «qızıl» dárejege kirgen «Xalıqlar doslıǵı» máhállesinde úyreniw jumısların alıp bardı. Process dawamında ishki isler uyımları hám máhálle jetiliginiń jumısı tallanıp, ámelge asırılıp atırǵan ilajlar talqılandı.
Máhállede qáwipsiz ortalıqtı jaratıw, máhállelerde jaslar, hayal-qızlar hám jumıssız puqaralar tárepinen, sonday-aq, shańaraqlıq qatnasıqlar sheńberinde júz beretuǵın jınayatlardıń aldın alıw baǵdarında ámelge asırılǵan jumıslar, «úlgili qáwipsiz kóshe» hám «úlgili qáwipsiz koridor»lardı durıs shólkemlestiriw máseleleri talqılandı.
Máhálle aymaǵında «Nókis diyqan bazarı» hám basqa da xalıq kóp jıynalatuǵın jámiyetlik orınlar barlıǵı inabatqa alınıp, kúsh quralların durıs bólistiriw, jınayatlardıń qaytadan júz beriwiniń aldın alıw, jınayatlardıń kúnlik talqılanıwın sistemalı jolǵa qoyıw, jumıssızlar hám kámbaǵal shańaraqlar reestrine kirgizilgen shaxslardıń bántligin támiyinlew arqalı olar tárepinen isleniwi múmkin bolǵan jınayatlar hám huqıqbuzarlıqlardıń aldın alıw baǵdarında bir qatar wazıypalar belgilep alındı.
Búgingi kúnde Nókiste kriminogen jaǵdaydı jaqsılaw maqsetinde ishki isler uyımları, máhálle jetiligi hám jergilikli hákimiyatlardıń birge islesiwinde kompleksli ilajlar ámelge asırılmaqta. Jınayatshılıq hám jámiyetlik mashqalalardıń aldın alıw ushın zárúrli baǵdarlar belgilengen.
Máhállelerde ishiwshilikke berilgen, náshebentlikke meyil bolǵan, ruwxıy keselliklerge shatılǵan shaxslardı emlew hám reabilitaciyalaw jumısları alıp barılmaqta.
Sonday-aq, «Sanlı qáwipsiz máhálle» joybarı sheńberinde qáwipsizlik sisteması modernizaciyalanıp, jınayatlar boyınsha maǵlıwmatlardı jedel analizlew imkaniyatı jaratılmaqta. Jaslar arasında jınayatshılıqtıń aldın alıwǵa qaratılǵan ilajlar kúsheytilip, orınlarda qáwipsiz ortalıq jaratıwǵa itibar qaratılmaqta.

Qaraqalpaqstan xabar agentligi