Ózbekstan rásmiy túrde Evroaziya rawajlanıw banki (EARB)ne aǵza boldı. Bul baǵdarda usı jıldıń 16-sentyabrinde mámleketimiz basshısınıń “Ózbekstan Respublikasınıń Evroaziya rawajlanıw bankine aǵza bolıw ilajları haqqında”ǵı tiyisli qararı qabıl etildi.

Bul hújjet 2006-jıl 12-yanvarda Astana qalasında qol qoyılǵan EARBdı shólkemlestiriw haqqındaǵı kelisimge qosılıw haqqındaǵı nızamdı ámelge asırıw sheńberinde qabıl etilgen.
Qararǵa muwapıq, Ózbekstanǵa banktiń ustav kapitalınan hár biri 1000 dollardan bolǵan 777 777 dana akciya bólistirildi. Olardan 168 411 i (21,7 procent) tólengen, 609 366 sı bolsa (78,3 procent) talap etilgende tólenetuǵın akciyalar bolıp esaplanadı.
Tólenetuǵın akciyalarǵa mámleketlik byudjetten 168,4 mln. dollar ajıratıladı. Usı muǵdardan 10 mln. dollar 2025-jıldıń ózinde tólenedi. 2026 hám 2027-jıllarda 79 mln. 205 mıń 500 dollardan tólenedi.
Maǵlıwmat ornında aytıw kerek, Evroaziya rawajlanıw banki 2006-jılı Rossiya hám Qazaqstan tárepinen shólkemlestirilgen xalıqaralıq finans shólkemi bolıp esaplanadı. 2009-jılı Armeniya hám Tájikstan, 2010-jılı Belarus, 2011-jılı bolsa Qırgızstan oǵan qosıldı. Banktiń ustav kapitalı 7 mlrd. dollardı quraydı.
EARBnıń bas ofisi Almata qalasında (Qazaqstan) jaylasqan. Banktiń Sankt-Peterburgta filialı hám Astana, Bishkek, Dushanbe, Erevan, Minsk hám Moskvada wákilxanaları bar.
Akciyalardı satıp alıw boyınsha tólem kestesi tastıyıqlanǵan. 2025-jılı zárúr qarjılar Investiciyalar, sanaat hám sawda ministrligine Ekonomika hám qarjı ministrligi tárepinen mámleketlik byudjet esabınan ajıratıladı. 2026-jıldan baslap bolsa bul qárejetler mámleketlik byudjet parametrlerine turaqlı túrde kirgiziledi.
Qarar Milliy nızamshılıq maǵlıwmatlar bazasında járiyalanǵan hám 2025-jıl 16-sentyabrden kúshke kirgen.
Oraylıq bank Ózbekstan Respublikasında Evroaziya rawajlanıw bankine tiyisli milliy valyutadaǵı pul qarjıları hám basqa da aktivlerdiń depozitariyi esaplanadı.

Sh.Mamaturopova,
ÓzA