Jınayat isleri boyınsha Ámiwdárya rayonı sudınıń baslıǵı J.Baltabaevtıń basshılıǵında, sudya járdemshisi E.Jumaniyazov, Ámiwdárya rayonı prokurorınıń aǵa járdemshisi hám rayonlıq IIB probaciya toparınıń aǵa inspektorınıń qatnasıwında usı rayondaǵı Bay awıl máhállesiniń hákimshilik imaratında ashıq kóshpeli sud májilisi shólkemlestirildi.

Onda Ózbekstan Respublikası Jınayat kodeksiniń 73-statyasına tiykarlanıp (jazanı ótewden múddetinen aldın shártli azat etiw) aldın jınayat islegen, biraq, dúzeliw jolına bekkem ótken, belgilengen tártip-qaǵıydalarǵa ámel etip, miynetke hadal qatnasta bolǵan 10 sudlanıwshı jazanıń ótelmey qalǵan bóleginen múddetinen aldın shártli azat etildi.
Sonday-aq, qamaqtaǵılarǵa jazanı múddetinen aldın shártli túrde azat etiliwi, olardıń moynınan tolıq juwapkershilikti alıp taslamaytuǵını, eger, jazanıń ótelmegen bólegi dawamında bilqastan jáne jınayat islense, Jınayat kodeksiniń 60-statyası (bir neshe húkim boyınsha jaza tayınlaw) qaǵıydalarına muwapıq jaza tayınlanatuǵını atap ótildi.
Bunday kóshpeli sud májilisleri qamaqtaǵılar hám jámiyet aǵzalarınıń sanasında nızam ústinligin bekkemlew, qayta tárbiyalaw procesinde huqıqıy mádeniyattı arttırıw jáne jınayat jolınan qaytqanlarǵa jámiyetke qaytıw imkaniyatın jaratıwǵa xızmet etedi.

Qaraqalpaqstan xabar agentligi