Iordaniya málimleme agentligi “Petra” hám “Royanews”, “Alghad” sıyaqlı mámlekettiń basqa da bir qatar jetekshi basılımları usı mámlekettiń sanaat, sawda hám támiynat ministri Yorub Qudah hám mámlekette bolıp turǵan Ózbekstan delegaciyası arasında bolıp ótken ushırasıwdı keńnen sáwlelendirdi.

Tárepler ekonomikalıq birge islesiw kólemin keńeytiw, bar baylanıslardan imkan dárejesinde paydalanıw ushın maqsetli baǵdarlar boyınsha jumıs rejesin dodaladı. Atap aytqanda, óz-ara sawda jeńilligi haqqındaǵı kelisimge qol qoyıw ushın zárúr tártip-qaǵıyda islep shıǵıw procesin jedellestiriwge kelisip alındı. Sonday-aq, birgeliktegi komitettiń birinshi májilisine puqta tayarlıq kóriw, keyingi háreketler ushın tutas baǵdarlardı anıqlaw zárúr ekenligi atap ótilgen.
Qudahtıń atap ótiwinshe, Iordaniya Patshası Abdulla II basshılıǵındaǵı delegaciyanıń ótken ayda Ózbekstanǵa ámelge asırǵan saparı eki tárepleme qatnasıqtı rawajlandırıwda áhmiyetli burılıs baǵdarı boldı. Endi hár eki tárep ekonomikalıq hám sawda birge islesiwin rawajlandırıwǵa isenimli umtılmaqta. Eń áhmiyetlisi, kiyim-kenshek, tógin, farmacevtika, azıq-awqat ónimleri, zergerlik buyımları sıyaqlı tarawlarda ele óz-ara paydalanılmaǵan salmaqlı potencial bar. Bul imkaniyatlar júzege shıǵıwı ushın birgeliktegi izbe-iz háreket talap etiledi.
Iordaniya hám Ózbekstan arasında sawda jeńilligi haqqındaǵı kelisimge qol qoyıw boyınsha texnikalıq processti jedellestiriw áhmiyetli. Jıldıń aqırına shekem ótkeriliwi rejelestirilgen Birgeliktegi komitettiń birinshi sessiyasında usı temadaǵı sóylesiw juwmaqlanadı hám kelisimge qol qoyıladı.
Ushırasıw sheńberinde biznes-forum bolıp ótedi. Jer Orta teńizi regionında jaylasqan Iordaniyanıń Irak, Siriya sıyaqlı iri bazarlarǵa kiriw esigi sıpatındaǵı roli menen baylanıslı abzallıǵı dodalanadı. Sebebi, eki hám kóp tárepleme, sonıń ishinde, AQSh, Evropa Awqamı hám basqa da regionlar menen qol qoyılǵan erkin sawda shártnamaları, sonday-aq, eski kontinent bazarına eksport etiw tártibin ápiwayılastırıw arqalı Iordaniya ónimlerin bir neshe bazarǵa eksport etiw imkaniyatı bar. Bunday kelisimler Ózbekstan kompaniyaları tárepinen investiciya kirgiziliwin xoshametleydi.
Ózbekstan Respublikası investiciyalar, sanaat hám sawda ministriniń orınbasarı Shohruh Ǵulomov eki mámleket sırtqı isler ministrlikleri tárepinen joqarı dárejedegi siyasiy erk-ıqrardı sáwlelendiriwshi “Jol kartası” tayarlanǵanın málim etti. Iordaniyaǵa sapar etiw ekonomikalıq hám sawda baylanısların bekkemlewge qaratılǵanı, respublikamız hár qıylı tarawlarda sheriklikti rawajlandırıwǵa isenimli umtılıp atırǵanın atap ótti. Tovarlarımız regionallıq bazarlarǵa shıǵıw maqsetinde Iordaniyada ózbek ónimlerin saqlaytuǵın qoymaxanalar shólkemlestiriw arqalı dástúriy emes logistika sistemasın jaratıw ushın mámleket járdemi zárúr ekenligin bildirdi.
Sonday-aq, region menen sawda almasıwın jeńilletiw ushın tiykarǵı oray sıpatında Aqaba portı menen birge islesiw jolları dodalandı.

Muharrama Pirmatova, ÓzA