Insan jámiyette óz ornın tabıwı ushın bilimli, sanalı hám miynetkesh bolıwı kerek ekenligin biz turmıstan kórip, gúwası bolıp júrmiz. Álbette, táǵdir óz húkimin ótkeredi. Lekin ondaǵı sınaqlardı jeńiw ushın ózińde kúsh tabıw, ózińniń jaqsı kórgen kásibińde miynet etiw, shańaraqta baxıt formulasın jaratıw arqalı jámiyetke kerekli insanǵa aylanasań.

Búgin alpıstıń asqarına minip atırǵan xojelishi Furxat Ótemuratovtıń basıp ótken ómir jolına kóz juwırtsaq, onıń ómir jolı jurnalistikada sóz sheberi, mádeniyat tarawında belgili rejissyor hám jaslarǵa tálim berip kiyatırǵan húrmetli ustaz sıpatında úsh kásiptiń mamanı ekenligin ańǵaramız. Miynetkeshligi, bilimi hám kásibine degen pidayılıǵı menen qaysı tarawda jumıs islese de óz ornı hám húrmetke iye bolǵan ustaz búgin óziniń miynetleriniń jemisleri bolǵan shákirtleriniń tabısları menen maqtanadı.
Furxat Utemuratov orta mektepti pitkergennen soń, Nókis mádeniyat texnikumında bilim aladı. Mádeniyat tarawında on jılǵa shamalas waqıt jumıs islegen ol, jurnalistikaǵa qızıǵıwshılıǵı sebepli Berdaq atındaǵı QMU dıń jurnalistika bóliminde bilim alıp, 1995-jılı oqıwdı tabıslı pitkerip, sol jerde studentlerge on jıldan aslam waqıt bilim beredi. Jurnalistika qánigeligi boyınsha jaslarǵa jetik bilim beriw menen birge mádeniyat tarawınan xabarı bar, rejissyorlıq qábiletine iye bolǵan ol studentlik dáwirinen baslap fakultettegi ótkeriletuǵın mádeniy ilajlarǵa, tańlawlarǵa student jaslardı tayarlap, óziniń jáne bir qábiletin júzege shıǵaradı. Sol waqıtlarda filologiya fakultetiniń komandası «Quwnaqlar hám ziyrekler», «Oy-pai-ki» tańlawlarında aldınǵı orınlardı iyelewge miyasar boladı. Sonday-aq, onıń jurnalistika baǵdarında jazǵan maqalaları, feleton hám publicistikaları respublikalıq gazetalarda járiyalanıp barıladı.
Xojeli rayonı Á.Xalimov atındaǵı xalıq teatrında rejissyor bolıp islegen dáwirlerinde Q.Mátmuratovtıń «Bir úyde eki ómir», S.Jumaǵulovtıń «Bultlı kúnler», S. Xojaniyazovtıń «Sen keshirermiseń» hám taǵı basqa da jazıwshı, dramaturglardıń shıǵarmaların saxnalastırıp, respublikalıq tańlawlarda qatnasıp aldınǵı orınlardı iyeledi. Ol usı miynetleri arqalı «Eń jaqsı rejissyor» nominaciyası menen sıylıqlanıwǵa miyasar boladı. 2012-jılı Xojeli rayonlıq 5-sanlı Balalar hám kórkem óner mektebiniń direktorı Q.Qarlıbaev onı mektepke teatr bólimin ashıw ushın jumısqa shaqıradı hám ol jerde oqıtıwshı bolıp jumıs baslaǵan onıń tayarlaǵan oqıwshıları respublikalıq tańlawlarda aldınǵı orınlardı iyelep kelmekte. Quwırshaq xám drama teatrı boyınsha jazǵan scenariyleri «Jetkinshek» respublikalıq balalar hám jas óspirimler gazetasında járiyalanıp, óz oqıwshılarına iye boldı.
Universitette oqıtıwshılıq kásibinen soń mádeniyat tarawında miynet jolın jalǵastırǵan ol 2011-jıldan baslap “Xojeli haqıyqatı” gazetasında jurnalistlik jumısın dawam ettiredi. Ol bul gazetada redaktor orınbasarı lawazımında jemisli miynet etip, bul dáwirlerde ol gazetanı hár tárepleme rawajlandırıw jolında pidayılıq kórsetiwi menen birge elimizde alıp barılıp atırǵan reformalardıń barısı, xalıqtıń turmıs jaǵdayı, tabıslar hám mashqalalar boyınsha qunlı maqalalar jazıp, keń jámiyetshilikke usındı. Ózine tán jurnalistlik usılı menen jurnalistlik mektep jarattı. Bul mektep házirgi kúnde de Xojeli rayonında tek ǵana baspasózdiń emes, al, barlıq túrdegi ǵalaba xabar qurallarınıń qáliplesiwine hám olardıń tabıslı jumıs alıp barıwına faktor bolmaqta.
Sonday-aq ol óziniń jumısı dawamında “Erkin Qaraqalpaqstan,” “Qaraqalpaqstan tańı,” “Vesti Karakalpakstana,” “Ustaz jolı,” “Qaraqalpaqstan jasları” hám “Ishonch” gazetalarında ruwxıy-aǵartıwshılıq, mádeniy temada publicistikalıq janrdaǵı hár qıylı atamalardaǵı maqalalardıń avtorı bolıp esaplanadı. Húrmetli Prezidentimiz tárepinen Qaraqalpaqstan Respublikasın sociallıq-ekonomikalıq jaqtan rawajlandırıw boyınsha qabıl etken qarar hám pármanları boyınsha respublikamızda alıp barılıp atırǵan keń kólemli reformalar, jańa ózgerisler haqqında jazılǵan maqalaları «Yangi Wzbekiston» gazetasınıń veb-saytında járiyalanıp kelinbekte.
F.Utemuratovtıń dóretiwshilik hám shólkemlestiriwshilik miynetleri húkimetimiz tárepinen ılayıqlı bahalanıp, 2021-jılı «Shuxrat» medalı menen sıylıqlandı. Sonday-aq, Ózbekstan Jurnalistler awqamı Qaraqalpaqstan Respublikası bólimi, Qaraqalpaqstan Respublikası Málimleme hám ǵalaba kommunikaciyalar basqarması hám rayon hákimligi tárepinen Húrmet jarlıqları hám diplomlar menen sıylıqlandı.
-Jurnalistikada oqıtıp, bilim bergen shákirtlerimniń ǵalaba xabar qurallarınıń hár qıylı tarawlarında jemisli miynet etip atırǵanlıǵın kórip kewlim quwanıshqa toladı. Olar menen maqtanaman. Mádeniyat tarawında da shákirtlerim kópshilikti quraydı. Ásirese, házirgi waqıtta Balalar hám muzıka mektebindegi kishkene balalardıń kórkem ónerge degen qızıǵıwshılıǵın kórip, olardıń kelesheginen kóplegen úmit kútemiz. Ustazdıń, tek ǵana bir tilek hám maqseti bar, olda bolsa shákirtleri durıs joldan júrip, elimizge paydası tiyetuǵın insanlar bolıp jetilisiwin kóriw. Meniń shákirtlerimnen kewlim toq,-deydi Furxat aǵa.
Insan jásmiyette óz ornın tabıwı ushın dáslep shańaraqta óz ornına iye insan bolıwı kerek. Furxat aǵa ómirlik joldası menen birgelikte úsh ul, bir qızdı tárbiyalap kamalǵa keltirip, aqlıqlar súyip otırǵan ádiwli áke.
Jurnalist, keń jámiyetlik, ruwxıy aǵartıwshılıq jumıslardıń belsendisi, úgit-násiyat toparı aǵzası hám bayram ilajları tamashaları rejissyorı bolǵan pidayı ustaz Furxat Ótemuratovtıń búgingi shıǵıp atırǵan 60 jası qutlı múbárek bolsın. Ómir jollarınıń jemisleri ele de dawamlı bolıp, shákirtler tayarlawda oǵan kúsh ǵayrat bárqulla joldas bolıp, jurnalistikadaǵı miynetleri xalıq mápi ushın xızmet etkey degen tilektemiz.

G.Turdıshova, Qaraqalpaqstan xabar agentligi