Ózbekstan avtomobil sanaatı sońǵı jıllarda jedel rawajlanıp, ishki talaptı támiyinlew hám eksport potencialın arttırıw jolında áhmiyetli jetiskenliklerge erispekte. Milliy statistika komitetiniń maǵlıwmatlarına bola, 2025-jıldıń dáslepki 7 ayında respublikada jámi 212 mıń 156 dana jeńil avtomobil islep shıǵarılǵan. Bul kórsetkish mámleket avtomobil sanaatınıń ósiw pátiniń turaqlılıǵın hám ishki bazar talabınıń joqarılıǵın kórsetedi.

Islep shıǵarılǵan avtomobiller modeller boyınsha tómendegishe bólistirilgen: Cobalt – 83 mıń 167 dana, Damas – 51 mıń 587 dana, Tracker – 26 mıń 385 dana, Onix – 18 mıń 734 dana, KIA – 14 mıń 419 dana, Chery – 4 mıń 838 dana, Haval – 4 mıń 425 dana, BYD – 8 mıń 601 dana hám arnawlı jeńil avtomobiller – 28 mıń 951 dana.
Cobalt avtomobilleri uzaq jıllardan berli Ózbekstan bazarında óz ornın bekkemlep kelmekte. Onıń salıstırmalı arzanlıǵı, texnikalıq xızmet kórsetiwdiń qolaylıǵı hám awısıq bólekleriniń bar ekenligi modeldi ǵalabalıqta uslap turıptı. 2025-jıldıń dáslepki yarımında bul model ulıwma óndiris kóleminiń derlik yarımın quraydı.
Jergilikli transport quralı sıpatında belgili bolǵan Damas avtomobilleri kishi biznes hám jeke mútájlikler ushın qolaylı transport quralı bolıp qalmaqta. Ol óndiris boyınsha ekinshi orındı iyelegen.
Sońǵı jıllarda islep shıǵarıla baslaǵan Chevrolet Tracker hám Onix modelleri zamanagóy dizaynı, qáwipsizlik sistemaları hám únemli dvigateli menen tutınıwshılardıń itibarın tarttı. Olardıń islep shıǵarıw kórsetkishleri, ásirese Trackerdiń, bul modeller keleshekte de bazarda bekkem orın ieleytuǵının kórsetpekte.
KIA hám Qıtay avtomobil gigantları BYD, Chery hám Havaldıń jergilikli óndiriske kirip keliwi avtomobil bazarındaǵı básekini kúsheytti. Atap aytqanda, BYD elektromobiller tarawında jedel alǵa qoyılmaqta hám 8 mıńnan aslam avtomobil islep shıǵarılǵan. Bul bolsa Ózbekstannıń elektromobil sanaatına qádem qoyıp atırǵanın bildiredi.
Óndiris kóleminiń artıwı tek ǵana bazar talabınıń artqanınan dárek bermeydi, al lokalizaciyalaw dárejesiniń artıp baratırǵanın da kórsetedi. Sońǵı jılları jergilikli islep shıǵarıwshılar avtomobillerdiń úlken bólegin ózinde tayarlawǵa itibar qaratpaqta. Bul bolsa importqa baylanıslılıqtı azaytıp, óndiris ózine túser bahasın tómenletiwge xızmet etpekte.
Ózbekstanda avtomobil sanaatı tek ǵana ishki bazardı toltırıw emes, al global avtomobil shınjırında óz ornına iye bolıwǵa háreket etpekte. Básekige shıdamlı modeller, sırt el investiciyaları, lokalizaciyalaw procesiniń jedellesiwi hám elektromobil baǵdarındaǵı strategiyalıq qádemler bul sanaattıń keleshegin perspektivalı etedi.

Dildora DWSMATOVA.
ÓzA