Respublikamızdıń barlıq aymaqlarında milletimiz mánawiyatı hám ádebiyatınıń sónbes juldızı, Ózbekstan hám Qaraqalpaqstan xalıq shayırı, Berdaq atındaǵı mámleketlik sıylıqtıń laureatı Tilewbergen Jumamuratovtıń 110 jıllıǵı keńnen belgilenbekte.

Atap aytqanda, Berdaq atındaǵı Qaraqalpaq ádebiyatı tariyxı mámleketlik muzeyinde Tilewbergen Jumamuratovtıń 110 jıllıǵına arnalǵan «Sózden marjan dizgen tókpe shayır» atamasında ádebiy eslew keshesi bolıp ótti.
Keshede Berdaq atındaǵı Qaraqalpaq mámleketlik universitetiniń professor-oqıtıwshıları, shayırdıń shańaraq aǵzaları, muzey xızmetkerleri, student-jaslar hám mektep oqıwshıları qatnasıp, QMU professorı f.i.d. G.Qarlıbaeva, usı joqarı oqıw ornınıń oqıtıwshısı G.Janibekovalar shayırdıń ómiri hám dóretiwshiligi haqqında bayanatlar jasadı.
Ilaj dawamında universitettiń kórkem óner fakulteti studentleri tárepinen atqarılǵan qosıqlar, Xojeli rayonı 32-sanlı mektep oqıwshıları tárepinen tayarlanǵan shayırdıń ómiri hám dóretiwshiligi menen baylanıslı saxnalıq kórinisler jıynalǵanlardıń itibarına usınıldı. Sonday-aq, onıń dóretiwshilik miyrasına da názer taslanıp, qosıqlarınan úlgiler oqıldı. Al, muzey foyesinde bolsa, Tilewbergen Jumamuratovtıń úy kitapxanasınan alınǵan kitapları, dóretiwshilik procesinde paydalanǵan buyımları, alǵan sıylıqları, ayırım tariyxıy hújjetleri kórgizbege qoyıldı.

Qaraqalpaqstan xabar agentligi