2025-jıl 16-sentyabr kúni qabıl etilgen Ózbekstan Respublikası Prezidentiniń “Respublika aymaqları, taraw hám tarmaqlarında sanlı texnologiyalardı engiziwdi bunnan bılay da jedellestiriw ilajları haqqında”ǵı qararı mámlekette sanlı texnologiyalardı engiziw procesin jedellestiredi. Qararda ayrıqsha itibar medicina, bilimlendiriw hám transport tarawlarındaǵı xızmetlerdi sanlastırıw sonday-aq, jasalma intellektten nátiyjeli paydalanıw máselelerine qaratılǵan.

2026-jıldıń aqırına shekem densawlıqtı saqlaw sistemasında “Shıpakerdiń sanlı járdemshisi” baǵdarlaması iske qosıladı. Bul baǵdarlama jasalma intellekt tiykarında islep shıǵılıp, medicinalıq tekseriw procesinde shıpakerdiń sózin avtomat túrde bayanlaytuǵın dawıslı járdemshi hám nawqaslarǵa diagnoz qoyıwda járdem beredi.
Bul qatnas tek ǵana densawlıqtı saqlaw sistemasınıń nátiyjeliligin arttırıp qoymastan, al nawqasqa xızmet kórsetiwdiń sapasın da jaqsılaydı. Bunday texnologiyalar sırt elde álle qashan tabıslı engizilgen bolıp, olardıń Ózbekstanda da engiziliwi medicina tarawında sanlı innovaciyalarǵa tiykar jaratadı.
2025-jıl 1-noyabrden mámleketlik joqarı bilimlendiriw mákemeleriniń studentlerine aylıq ijara tóleminiń bir bólegin qaytarıw boyınsha Birden-bir portal arqalı múrájat etiw imkaniyatı jaratıladı.
Bul imkaniyat studentlerdiń sociallıq sharayatların jaqsılaw, jasaw qárejetleriniń bir bólegin qaplawǵa tiykar jaratıp, xızmetlerden paydalanıwda ashıq-aydınlıqtı támiyinleydi. Sanlı múrájat túri korrupciya jaǵdaylarınıń aldın alıwda da áhmiyetli qural bolıwı múmkin.
2026-jıl 1-yanvardan orta arnawlı, kásip-óner hám joqarı bilimlendiriw shólkemlerinde bilimlendiriw procesine baylanıslı mámleketlik xızmetler Birden-bir portal arqalı kórsetiledi.
Bul basqıshtan baslap barlıq bilimlendiriwge baylanıslı mámleketlik xızmetler birden-bir portal arqalı usınıladı. Oǵan oqıwǵa qabıllaw, diplomlardı tastıyıqlaw, kóshiriw, akademiyalıq maǵlıwmatlar alıw sıyaqlılar kiredi. Sanlastırıw arqalı artıqsha qaǵazpazlıq saplastırılıp, bilimlendiriwdegi basqarıw sisteması qolaylasadı.
2025-jıl 1-noyabrden transportqa gaz balonı ornatılǵanına baylanıslı maǵlıwmatlardı elektron túrde júrgiziw arqalı transport quralın dizimnen ótkeriw gúwalıǵın qayta rásmiylestiriw tártibi biykar etiledi.
Avtotransport tarawında bunday ápiwayılastırıwlar avtotransport iyeleri ushın qolaylıq jaratadı, waqıt hám qarjını únemlewge xızmet etedi. Sonday-aq, Jol háreketi qáwipsizligi aymaqlıq bólimlerindegi artıqsha júklemeni azaytadı.
Prezident qararı tek ǵana texnologiyalıq jaqtan aldınǵı emes, al sociallıq ádillik hám xızmetlerde teńlikti támiyinlewge qaratılǵan.

Dildora DWSMATOVA.
ÓzA