Tashkent qalasında Óxbekstan Respublikası Prezidentiniń “El-yurt umidi” stipendiyasınıń sıylı orın iyelerin sıylıqlawǵa baǵıshlanǵan forum bolıp ótti.

Stipendiyatlar, olardıń ata-anaları, mámleketlik strukturalar, diplomatiyalıq wákilxanalar hám birge islesiwshi shólkemlerdiń wákilleri qatnasqan ilajda “El-yurt umidi” stipendiya baǵdarlaması tek talantlı jaslardı qollap-quwatlaw emes, al uzaq múddetli mámleketlik strategiyanıń bir bólegi ekenligi atap ótildi.
Tiykarǵı maqset – “Ózbekstan – 2030” strategiyasında qoyılǵan wazıypalardı turmısqa engize alatuǵın reformashılar hám jetekshiler áwladın tayarlawdan ibarat. Neft hám gaz dáramat keltiriwi múmkin, biraq bilimli hám umtılıwshań jaslar mámlekettiń turaqlı rawajlanıwın támiyinleydi.
Stipendiatlar Kembridj, Oksford, Pensilvaniya, Seul, Nyu-York hám Gonkong sıyaqlı universitetlerge oqıwǵa kirgen jaslar ózleriniń tańlawları, maqsetleri hám rejeleri haqqında aytıp berdi. Olardıń tolqınlandırıwshı shıǵıp sóylewleri sonı ayqın kórsetti, hár bir stipendiya tek ǵana imkaniyat emes, al jańa bilimler menen Watanǵa qaytıw minnetlemesi de bolıp esaplanadı.
Forum sheńberinde birinshi márte «EYUF AWARDS – 2025» tańlawınıń jeńimpazların sıylıqlaw máresimi ótkerildi. 7 nominaciya boyınsha eń jaqsı stipendiatlar sıylıqlandı. Atap aytqanda, “Jıldıń úlgili stipendiatı,” “Jıldıń eń jaqsı akademiyalıq jetiskenlikleri,” “Jıldıń eń jas jetekshi stipendiatı,” “Jıldıń úlgili joybarı,” “Jıldıń eń jaqsı ilimiy joybarı,” “Óz kásibiniń sheberi,” “Jámiyetke qosqan úlken úlesi ushın” sıylıqları berilgen.
Bul tańlaw “El-yurt umidi” stipendiyası tek ǵana oqıwdı qollap-quwatlaw emes, al sociallıq belsendilik, nátiyjeli kásiplik hám ilimiy jumıstı dawam ettiriwge xoshametlewge qaratılǵan.
Akademiyalıq baylanıslardı bekkemlew hám ózbekstanlı jaslardıń sırt elde bilim alıwın qollap-quwatlawǵa úlken úles qosqan birge islesiwshiler – ministrlikler, mámleketlik uyımlar hám sırt mámleketlerdiń Ózbekstandaǵı diplomatiyalıq wákilxanalarına minnetdarshılıq xatları tapsırıldı.
Forumnıń juwmaqlawshı bóliminde ótmish hám keleshekti, dástúrler hám reformalardı simvolikalıq mániste baylanıstırǵan jarqın kórkem shıǵıwlar jıynalǵanlarda úlken tásir qaldırdı.

Norgul ABDURAIMOVA,

ÓzA