Ámiwdárya rayonında ótkerilgen ilajda Qaraqalpaqstan Respublikası Ministrler Keńesiniń Baslıǵı F.Ermanov, rayon hákimleri, awıl xojalıǵı xızmetkerleri, fermerler, sonday-aq paxta teriw mashinalarınıń operatorları hám mexanizatorlar qatnastı.

Seminar dáslep Tolqın awıl puqaralar jıyını aymaǵında jaylasqan «Xidirov Samad» fermer xojalıǵında baslanıp, bul jerde Túrkiya Respublikasınıń “Cansa” kompaniyası tárepinen islep shıǵarılǵan paxta teriw mashinasınıń jumıs islew processi hám onıń artıqmashılıqları qatnasıwshılarǵa kórsetildi.
Bunnan soń ilaj qatnasıwshıları Shaykól APJ aymaǵında jaylasqan «Shaykól Doslıq» fermer xojalıǵınıń paxta atızında Qıtaydıń «Fm Word» kompaniyası tárepinen islep shıǵarǵan paxta teriw mashinasınıń jumısı hám onıń múmkinshilikleri menen tanıstı.
Seminar sońında Qaraqalpaqstan Respublikası Ministrler Keńesiniń Baslıǵı F.Ermanovtıń basshılıǵında paxta mashinaların islep shıǵarıwshılardıń qatnasıwında májilis ótkerilip, onda paxta jıyın-terimin shólkemleskenlik penen ótkeriw boyınsha juwapkerlerge anıq tapsırmalar berildi.
Bunnan soń májilis qatnasıwshıları paxta mashinaların islep shıǵarıwshı zavod wákillerine ózlerin qızıqtırǵan sorawlar menen múrájat etip, olarǵa tolıq juwap aldı.

Qaraqalpaqstan xabar agentligi