Mámleketimiz basshısına Xorezm wálayatında reformalardıń nátiyjeliligi hám jańa rejeler boyınsha málimleme berildi.

Tábiyǵıy resursları sheklengen bul aymaq ekonomikası strukturalıq ózgerisler arqalı rawajlanbaqta. Keyingi segiz jılda 2 milliard dollar investiciya kirgizilip, 25 mıńnan aslam sanaat kárxanaları ashılǵan. Óndiris kólemi 2,2 esege artqan. Búgin wálayatta toqımashılıq, avtomobil qurılısı, elektr texnikası, azıq-awqat hám qurılıs materialları sanaatı bar.
Toshsoqa magistral kanalınıń qayta tikleniwi nátiyjesinde Xorezm ushın oǵada áhmiyetli bolǵan suwǵarıw sisteması jaqsılandı. Ámiwdáryanıń ústinde jańa kópirdiń qurılıwı wálayat xalqınıń uzaǵın jaqın etti.
Segiz jılda wálayatta 660 kóp qabatlı turaq jay qurılıp, 21 mıń shańaraq jańa turaq jayǵa iye boldı. 4 mıń 751 kilometr ishimlik suwı hám 206 kilometr kanalizaciya tarmaǵı qurıldı, 580 mıń xalıq birinshi márte oraylasqan ishimlik suwınan paydalanadı.
Usı jıldıń basınan berli 100 mıń járdemge mútáj xalıq jumıs penen támiyinlendi. Kámbaǵallıq dárejesi yanvardaǵı 12 procentten 6,8 procentke túsip, eń jaqsı kórsetkish boldı.
Bunday jumıslardı bunnan bılay da keńeytiw maqsetinde Xorezm wálayatında da “Reformalar shtabı” dúzildi. Prezentaciyada isbilermenlerdiń usınısları tiykarında islep shıǵılǵan jańa joybarlar haqqında málimleme berildi.
Máselen, Qubla Koreyanıń 100 million dollar investiciyası esabınan Úrgensh rayonında shıǵındını jaǵıw arqalı elektr energiyasın alıw joybarı mólsherlengen.
Avstraliya kompaniyası 820 million dollar investiciya kirgizip, Topıraqqala rayonında 600 mıń tonna ekologiyalıq taza aviaciya janılǵısı hám 50 mıń tonna “jasıl dizel” islep shıǵarıw usınısın bildirgen. Kárxana mútájligi ushın 5,5 mıń gektarda 4 gigavatt quyash panelleri ornatılıwı názerde tutılǵan.
Sonday-aq, Slovakiya kárxanası 170 million dollar esabınan Topıraqqala rayonında 5 mıń gektarda raps jetistirip, biojanılǵı islep shıǵarıw zavodın qurıwdı rejelestirgen.
Ulıwma, Xorezmde 2 milliard 400 million dollarlıq jańa joybarlar tayarlanǵan. Sonday-aq, qala hám rayonlardıń qosımsha imkaniyatları esabınan jáne 86 million dollarlıq perspektivalı joybar hám baslamalar qáliplestirilgen.
Mámleketimiz basshısı investorlarǵa qolaylıq jaratıp, joybarlardı jedellestiriw boyınsha tapsırmalar berdi.
Wálayattaǵı sanaat zonalarınan tolıq paydalanılmay atırǵanı kórsetip ótildi. Infrastruktura hám jer kategoriyası máselesin sheship, 100 den aslam joybardı iske qosıw zárúr ekenligi aytıldı. Xorezmniń jaylasıwınan kelip shıǵıp, sanaat baǵdarların puqta rejelestiriw, oǵan wálayattıń ishki potencialın tolıq jumsaw kerek ekenligi atap ótildi.
Isbilermenlikti rawajlandırıw, jasırın ekonomikanıń úlesin qısqartıw máselelerine de toqtap ótildi.

ÓzA