Nızam joybarına túsinik

Mámleketimizde xalıqtı sociallıq qollap-quwatlaw, sociallıq qorǵaw ilajların kúsheytiw, mámleket tárepinen puqaralarǵa sociallıq xızmet kórsetiw kólemi hám túrlerin keńeytiw boyınsha bir qatar jumıslar ámelge asırılmaqta.
Bul baǵdardaǵı jumıslar tiykarında ayırım kategoriyadaǵı puqaralardıń qalalıq jolawshı transportınan biypul paydalanıw imkaniyatlarınıń jaratılǵanı itibarǵa ılayıq.
Sonıń ishinde, búgingi kúnde 9 kategoriyadaǵı shaxslar qalalıq jolawshı transportınan biypul paydalanıw huqıqına iye. Keyingi 2 jılda mámleketimiz basshısınıń baslaması menen basqalardıń kútimine mútáj bolǵan jalǵız kekseler, jalǵız jasawshı kekseler hám mayıplıǵı bolǵan shaxslarǵa, sonday-aq, “Ózbekstan Respublikasınıń húrmetli donorı” kókirek belgisi menen sıylıqlanǵan puqaralarǵa qalalıq jolawshı transportınan biypul paydalanıw imkaniyatı berildi.
Endi bul kategoriyadaǵı shaxslardıń qatarı keńeymekte. Sociallıq qorǵawǵa mútáj xalıqtı qollap-quwatlawǵa qaratılǵan jańadan islep shıǵılǵan nızam joybarına bola, I topar mayıplıǵı bolǵan hám olarǵa járdemshi bolǵan bir shaxsqa jáne Ekinshi jer júzilik urıs mayıplarına teńlestirilgen shaxslarǵa qalalıq jolawshı transportınan biypul paydalanıw imkaniyatı jaratılmaqta.
Sonday-aq, joybarda mámleketlik uyımlar hám olardıń lawazımlı shaxsları avtomobil transportında jolawshı hám júk tasıw jumısı menen shuǵıllanıwshı fizikalıq hám yuridikalıq táreplerdiń xojalıq jumısına aralasıwı hám usı shólkemlerdiń jumıs islep atırǵan xızmetkerlerin basqa jumıslarǵa tartıwı tek ǵana tábiyǵıy hám texnogen xarakterge iye ayrıqsha jaǵdaylar júzege kelgende, bunday jaǵday engizilgen jaǵdaylarda ámelge asırılatuǵını belgilenbekte.
Jaqında parlamenttiń tómengi palatası tárepinen birinshi oqıwda qabıl etilgen bul nızam joybarında názerde tutılıp atırǵan normalar xalıqtıń sociallıq qorǵawǵa mútáj qatlamların qollap-quwatlaw, mámleket tárepinen puqaralarǵa sociallıq xızmet kórsetiw kólemin bunnan bılay da keńeytiwge xızmet etedi. Sonıń menen birge, nızam hújjetlerindegi boslıqlardıń tolıqtırılıwına tiykar boladı.

Muhtarama Komilova, ÓzAnıń xabarshısı