Ózbekstan Respublikası Prezidenti Shavkat Mirziyoev Sankt-Peterburg qalasınıń gubernatorı Aleksandr Beglov basshılıǵındaǵı Rossiya delegaciyasın qabılladı.

Ózbekstan – Rossiya óz-ara paydalı birge islesiwin bunnan bılay da keńeytiw, bárinen burın, Sankt-Peterburg qalası menen ekonomikalıq kooperaciya joybarların hám mádeniy-gumanitarlıq almasıw baǵdarlamaların ámelge asırıw máseleleri kórip shıǵıldı.
Óz-ara tovar almasıw kórsetkishleriniń ósip atırǵanı qanaatlanıwshılıq penen atap ótildi – ótken jıldıń juwmaqlarına bola aymaqlar dárejesindegi eksport-import kólemi 20 procentke arttı. Paytaxtımızda Isbilermenlik orayınıń jumısın jolǵa qoyıw, sonday-aq, Jańa Tashkent aymaǵında “Peterburg massivi”n qurıw joybarın tayarlaw jumısları alıp barılmaqta.
Rossiya delegaciyasınıń bul retki saparı waqtında metallurgiya, úskene qurılısı, jol qurılısı, farmacevtika hám densawlıqtı saqlaw, azıq-awqat sanaatı, awıl xojalıǵı, logistika hám basqa da tarawlarda 23 kooperaciyalıq joybardı ámelge asırıw boyınsha “jol kartası” qabıl etildi.
Jeke menshik medicina, bilimlendiriw, kommunal xojalıǵı, sanlı texnologiyalar, migraciya hám turizm tarawlarında ámeliy birge islesiwdi keńeytiw boyınsha anıq usınıslar qollap-quwatlandı.
Jedel gumanitarlıq baylanıslardı dawam ettiriw hám birgeliktegi mádeniy ilajlardı turaqlı shólkemlestiriwge ayrıqsha itibar qaratıldı.
Usı jıldıń oktyabr ayında eki mámleket aymaqları keńesiniń ekinshi májilisin nátiyjeli ótkeriwge qaratılǵan ilajlardı kóriwge kelisip alındı.

ÓzA