Prezident Shavkat Mirziyoev awıl xojalıǵında jer resurslarınan nátiyjeli paydalanıw boyınsha usınıslar menen tanıstı.

Sońǵı bes jılda jer esabın júrgiziw boyınsha jańa sistema jaratıldı, qısqa waqıtta mámleketimizdegi 45 million gektarǵa shamalas jer maydanınan 42 million gektarı, yaǵnıy 94 procenti, awıl xojalıǵına mólsherlengen 26 million gektardan aslam jerlerdiń 88,4 procenti mámleketlik dizimnen ótkerildi.
Prezentaciya dawamında burın puqaralar hám shólkemler paydalanıwında bolıp, rayon hákimlikleri qaramaǵına qaytarılǵan bos jerlerdiń esabın óz aldına júrgiziw zárúr ekenligi atap ótildi. Bunday jerlerdi qısqa múddette aukcionǵa shıǵarıw boyınsha insan faktorısız isleytuǵın sistema jaratıw tapsırıldı.
Awıl xojalıǵında jerge ijara huqıqın bazar aktivine aylandırıw boyınsha jumıslar baslandı, jerge baylanıslı qayta ijara, ekilemshi ijara institutları kirgizildi.
Endi ijaraǵa berilgen jerlerdiń bir bólegin qayta ijaraǵa beriwge, yaǵnıy bir bólegin ózinde qaldırıp, qalǵan bólegin basqa ijarashıǵa ótkeriwge de ruqsat beriledi. Burın bunıń ushın jerdi mámleketke qaytarıw hám jańadan aukcionǵa shıǵarıw kerek edi.
2021-jıldan baslap awıl xojalıǵı jerleri tek ǵana ijara huqıqı menen ajıratılmaqta. Májiliste 2027-jıl 1-yanvarǵa shekem awıl xojalıǵında paydalanılıp atırǵan barlıq jerlerdi ijara huqıqına ótkeriw zárúr ekenligi atap ótildi.
Awıl xojalıǵına mólsherlengen jerlerge xızmet kórsetiwshi obektler – jeńil konstrukciyalı muzlatqıshlı qoymaxanalar, saylap alıw, qadaqlaw orınları, suwdı únemleytuǵın texnologiyalar, atız shertegi, texnika parkin qurıwǵa ruqsat beriledi.
Onıń ushın aldın jer dúziw joybarı islep shıǵılıp, tastıyıqlanadı. Bul joybar qurılısqa ruqsat beriw waqtında jerge bolǵan huqıqtı tastıyıqlawshı hújjet sıpatında qabıl etiledi.
Bul jańalıq awıl xojalıǵında jańa imkaniyatlardı ashadı, baǵman óz baǵınıń bir shetinde miyweni saqlaw ornı, sharwa óz jaylawınıń bir bóleginde sharwa malları hám sharwa ot-jemin saqlaw orınların qurıw imkaniyatına iye boladı.
Mámleketimiz basshısı awıl xojalıǵında ijara qatnasıqların bunnan bılay da rawajlandırıw, ijarashılardıń huqıqları menen máplerin qorǵaw, tarawǵa bazar qatnasıqların jáne de keńnen engiziw boyınsha kórsetpeler berdi.
Prezentaciya juwmaǵında bul ilajlardı ámelge asırıw boyınsha pármanǵa qol qoyıldı, nızamnan kelip shıǵatuǵın hújjetlerge tiyisli ózgerisler kirgiziliwi belgilendi.

ÓzA